Бүгүн, 6-февраль күнү Жогорку Кеңештин кезектеги жыйынында депутат Чыныбай Турсунбеков Кытайдагы окуган студенттер өлкөгө келе албай жатышканын, Россиядагы сайтта кыргыз паспортун жасайбыз деп ачык эле жазылып турганын айтып, Өкмөттү сындады.
Муну менен катар депутат Бишкектеги Ош базарында сойкукана бар экенин айтып, ал жакка Караколдон майыптыгы бар 16 жаштагы кызды алып келип, мажбурлап иштеткенин белгилеп, милиция аларды бир күндө таппай калганын айтып нааразы болду.
“Ош базарындагы милициянын маңдайында өмүр бою сойкукана иштеп келген. Азыр эми ызы-чуу чыккандан кийин милиция аны иштеткен адамдарды таппай жаткан имиш. Караколдогу кыздын ата-энесине чейин барышып, аларды коркутуп-үркүтүү болуп жатыптыр. Милиция ошолордун артынан иштебейби? Өкмөт ушул маселелерди чечпейби?!” – деп билдирди.
Депутат өкмөттүн өкүлүнө кайрылып: “Кат менен кайрылсак жоопсуз калат экен. Жок дегенде ачык айталы, жооп бергиле”, – деди.
Булак: «KyrgyzToday»
КОММЕНТАРИЙ КАЛТЫРУУ