Бүгүн, 31-августта, Кыргыз Республикасынын Көз карандысыздык күнү белгиленүүдө.
«Ала-Тоо» борбордук аянтында Кыргыз Республикасынын Көз карандысыздык күнүнүн 29 жылдыгына карата иш-чара өттү.
Иш-чара Кыргызстан элинин тарыхый жолу темасын ачып берген театрлаштырылган пролог менен башталды.
Кыргыз Республикасынын Президенти Сооронбай Жээнбеков иш-чарада куттуктоо сөзүн сүйлөдү. Мамлекет башчысы куттуктоосунда мамлекетибиздин көз карандысыздыгын, элибиздин ынтымагын, жерибиздин бүтүндүгүн көзүбүздүн карегиндей коргоо — ар бирибиздин ыйык милдетибиз экенин баса белгиледи.
Иш-чара пандемияны эске алуу менен онлайн форматта, көрүүчүлөрсүз өттү. Чакырылгандардын арасында бүгүнкү күндүн баатырлары — медиктер, ошондой эле пандемиянын күчөп турган мезгилинде күчөтүлгөн тартипте кызмат кылган ички иштер органдарынын, ӨКМдин кызматкерлери, аскер кызматкерлери болду. Ошондой эле топтогон каражаттарын коронавирус инфекциясына каршы күрөшүү үчүн берген ыктыярчы-балдар бар. Мамлекет башчысынын атынан балдардын ар бирине планшет белекке берилди.
Иш-чара башталардын алдында Президент балдар менен баарлашып, алардын окууларына ийгиликтерди жана бакыт-таалай, ойлогон максаттарынын аткарылышын каалады. «Силерге окшогон патриот жана билимдүү балдар көп болсун. Силер — Кыргызстандын келечегисиңер», — деп белгиледи Сооронбай Жээнбеков.
Кыргыз Республикасынын Көз карандысыздык күнүнүн 29 жылдыгына карата иш-чара концерттик программа менен жыйынтыкталды.
Иш-чарага Жогорку Кеңештин Төрагасы Дастанбек Жумабеков, Премьер-министр Кубатбек Боронов, Жогорку Соттун төрайымы Гүлбара Калиева, экс-президент Роза Отунбаева, Куралдуу күчтөрдүн Башкы штабынын жетекчиси Райимберди Дуйшенбиев, Бишкек шаарынын мэри Азиз Суракматов катышышты.
Кечинде Бишкек шаарында майрамдык фейерверк болот.
КОММЕНТАРИЙ КАЛТЫРУУ