Өлкөдө глобалдык реформалар болууга тийиш. Ошол реформалар кайсыл нукта жана максаты эмнеде деген ой жүгүртүү керек… . Чуулгандуу резонанс жараткан 80дей чет өлкөлүк жарандардын жасалма паспорт менен кармалганы үчүн ким жооп берди? Заводдон чыкканына 30 жылдан ашкан чет өлкөлүк автоунааларга жаңы номур берилип жатат. Мейли мамлекетибиздин абройю дейли, бирок ал техникалар өздөрүнүн ресурстарын бүткөрүп, чыгарган мамлекеттерде утилге кеткенин билебиз. Жараксыз деп табылган техникага жаңы номур тагуу маселеси актуалдуубу, же мунун аркасында башка бир максаттар барбы? Ч. Айтматовдун “жаныбарым Гүлсарысына” Аккуланын ээрин токугандай эле болуп калды көрүнөт. Элдин чөнтөгүнө кол салуунун мыйзамдуу жолун таптыңар, же мамлекетибизде башка проблемалар түгөндүбү? Азыркы бийликтин убадаларынын эң негизгиси экономиканы көтөрүп, элдин жашоосун жакшыртуу эмес беле?
Мамлекеттик каттоонун башчысы Тайырбек Сарпашев баардык маселелерди чечип койгонсуп, эми Кыргыз мамлекетинин эгемендүүлүгүнө, абройюна шек келтирүүдө деп ойлойм. Учурунда Аскар Акаевдин саясатын ишке ашырганга зор салым кошкон Тойчубек Касымов Кыргызстанды “общий домго” айландырса, эми күйөө баласы Тайырбек Сарпашев мамлекетибизди көпчүлүк айткандай “общий дворго” айландырабы? Же К.Ташиев айткандай бирөөлөр мажбурлап атса ачыгын айтсын… Кылымдарды карыткан Кыргыз улутун жок кылып жиберебизби? Кыргызды жок кылабыз дегендер азыр Кыргыз менен эсептешүүгө мажбур болуп жатпайбы! Мыйзамдын ээси эл экенин эстен чыгарбайлы! Мындай глобалдык маселени эл чечсин, кандай мамлекетте жашай турганын. Кечээ эле “Алга Кыргызстандын” камчысын чаап жүргөн Т.Сарпашев кийин КСДПга кирип Кыргызстандын тагдырына “салым” кошуп жатканыбы?! 2010жылы 27-июнь Референдумунан кийин ошол кездеги премьер-министр А.Атамбаев Т.Сарпашевди биз менен тааныштырып, КСДПга киргенин билебиз. Биз башыбызды тобокелге сайып жүргөндө биз билбеген Т.Сарпашев азыр мамлекетибиздин тагдырын чечүүдө этият бол демекчибиз!
Төлөгөн Наралиев, “Акыйкат” кыймылынын төрага орун басары, Апрель баатыры, Талас облусу
КОММЕНТАРИЙ КАЛТЫРУУ