Курманбек Бакиев: “Кан досум Маматкадыр чалып, сен ооруба досум, мекенге келериңди билем деди”

Бүгүн, 31-декабрда мурунку президент Курманбек Бакиев Фейсбук баракчасында досу Маматкадыр тууралуу билдирүү жазды.

Анын айтымында, ал бүгүн досунун каза болгонун уккан.

“Мындан бир жума мурда эс тартканда тапкан досум Маматкадыр байланышка чыкты. Жакшылык – жамандыкта жанымда болуп кошо тарткан кан досум. Зээндүү жан болгондуктан үнүмдөн байкап шыр эле абалымды дыкааттык менен сурап кирди. Ден-соолугума байланыштуу тумоолоп калганымды айттым. “Сен мен үчүн эң жакын досумсуң. Сен ооруба досум, мекенге келериңди билем. Быйыл тоо аралап тоонун гүлдөрүн топтодум, сен келсең биздин ак ниет, таза аруу балалыгыбыз өткөн “Орто Азияда” жолугушабыз буюрса” – деп тамаша чынын аралаштырып бир сааттай сүйлөштүк.

Бүгүн минтип суук кабарды угуп кабыргам кайышып отурам. Жаткан жериң жайлуу топурагың торко болсун. Жараткан ырайымына алып, мээримине бөлөсүн. Маматкадыр досумдун өмүрлүк жарына, балдарына, жакындарына сабыр тилеймин“, – деп жазды мурунку президент Курманбек Бакиев.