Кыргыз Республикасынын Маданият, маалымат, спорт жана жаштар саясаты министри Кайрат Иманалиевдин Ош шаарына болгон иш-сапарында бир катар маданий мекемелерге барды. Бул тууралуу министрликтин басма сөз кызматы билдирди.
Анда ал Бабур атындагы Ош Мамлекеттик академиялык өзбек музыкалуу драма театрынын эмгек жамааты менен жолугуп, 2021 -жылы белгилене турган 100 жылдык юбилейин жогорку деңгээлде өткөрүү маселесин уюштуруу комитети менен талкуулады.Эске салсак, Кыргыз Республикасынын Президентинин Өзбекстанга болгон расмий иш сапарынын алкагында аталган театрдын 100 жылдык мааракесине карата капиталдык оңдоп-түзөө иштерин жүргүзүү макулдашылган. Учурда макулдашууну ишке ашыруу аракеттери толугу менен башталды.
Министр Кайрат Иманалиев Ниязалы Борошов атындагы музыкалык окуу жайынын жетекчилиги жана педагогикалык курамы менен жолугуп, учурдагы көйгөйлөрү жана токтоп калган курулуш иши, адистердин жетишсиздиги жана мындан кийинки келечеги тууралуу кенен талкуу өткөрдү. Жыйындын жүрүшүндө көйгөйлөрдү чечүү үчүн тиешелүү тапшырмалар берилди. Ошону менен бирге, окуу жай тарабынан атайын даярдалган чакан форматтагы тандалма-концерттик программа көрсөтүлдү.
Кыргыз Республикасынын Премьер – министринин Өзбекстанда болгон иш сапарынын алкагында бир катар маданий макулдашуулар жүргүзүлгөн. Өзбекстанда жашаган кыргыз жарандары үчүн улуттук кийимдер, аспаптар жана адабияттар белекке берилип, жакынкы убактарда Өзбекстандагы окуу жайлардын биринде кыргыздан улуттук аспаптарын үйрөтүү боюнча бөлүм ачылуу менен, комуз, чопо- чоор жана кыл аспаптар боюнча сабак берүүгө Н. Борошов атындагы музыкалык окуу жайы сындуу мекемелердин окутуучуларын тартылаары айтылды.
Мындан сырткары, министр Таш-Мияшов атындагы Ош облустук балдар китепканасында болуп, учурда талаш жаратып жаткан имарат маселесин тиешелүү органдар менен чечүү боюнча сүйлөшүүлөр жүргүзүлөөрү, аталган китепкананын Ош облусу жана шаар тургундары үчүн мааниси чоң экендиги айтылып, келечекте китепкана приоритеттүү багыттарды колго алып, өсүп келе жаткан муун үчүн таасирдүү жана маданий аянтча боло тургандыгы баса белгиленди.
Министрдин кийинки жолугушуусу Бекмуратов атындагы Ош шаардык музыкалык мектебинде уланып, окутуучулар менен маек курду. Анда материалдык техникалык база, окуу класстарынан кабар алып, маселе жараткан маанилүү жагдайларга токтолду.
КОММЕНТАРИЙ КАЛТЫРУУ