КООМ

Кыргызстандагы улуттук-мекенчил күчтөрдүн биримдиги – КУМКБнын 28-апрелде өткөргөн уюштуруу жыйынында кабыл алынган Курултай институтун мыйзамдаштыруу, паспортто “улуту”- деген графаны калтыруу талаптары бийлик бутактарына жөнөтүлдү. КУМКБ түзгөн Туруктуу Элдик Кенеш – ТЭК иштей баштады.Туруктуу Элдик Кеңештин сунушу менен 17-май күнү бардык облустарда бир мезгилде аймактык курултайларды, 23-май күнү борбордо Жалпы Улуттук Курултайды өткөрүү демилгеси көтөрүлүүдө. Жакында президент А. Атамбаев да Элдик курултай демилгесин колдой тургандыгын билдирди. Бирок КУМКБнын мүчөлөрү мамлекет башчынын ал демилгесин колдойбу, жокпу, бул жагы белгисиз. Анткени ортодо кимдер мүчө – делегат болору талаш жаратышы мүмкүн. Себеби баардык мамлекеттик бийлик бутактары Элдик курултайга отчет берүүгө милдеттүү болору сунушталып аткандыктан, ага мүчө болууну каалагандар, бийлик тарабынан өздөрүнүн “кол балдары” да кирип кетиши мүмкүн. Канткен менен он жылга жакын убакыт бою ишке ашпай келаткан Элдик курултай институту быйыл ары же бери болот окшойт.

Булак: “Майдан.kg”

Быйыл өлкөбүздүн түштүгүндө жер көчкүдөн тышкары жер титирөө да көп катталууда. 3-майдан бери Чон-Алай районунда түрдүү магнитудадагы 16 жер титирөө катталып, анын 8и төрт баллдан жогору болду. Жалпысынан 993 турак үй текшерүүдөн өтүп, анын 8и толук жарактан чыккандыгы, 529 үй авариялык абалда экендиги жана 456 үй түрдүү оңдоого муктаж экени аныкталды. Ошондой эле жергиликтүү оорукана да капиталдык оңдоого муктаж жана жер титирөөдөн мечит менен орто мектеп да жабыркаган. Жабыркаган жергиликтүү элге 510 чатыр тигилип, ага 3 миңге чукул адам жайгаштырылды. Учурда жарандьж коргонуу органдары келтирилген чыгымдарды аныктоо иштерин жүргүзүүдө. Бактыга жараша эч ким жабыркабай, бир гана тамдын дубалы басып калган адам ооруканага жаткырылды. Дүйнөлүк практикада 8 баллдан жогору жер титирөө болгондо бекем курулган имараттар да кыйрап каларын эске алганда, бул ирет табият менен Кудай элибизге боор ооругандай. Жергиликтүү элдин айтуусунда, айыл жеринде үйлөр менен там, сарайлар ылайдан салынган менен, алардын дубалы калын жана жапыс, сынч (тактайды каршы-терши кылып) менен салынгандыктан гана кыйроолор аз болду. Ошентсе да мындан ары үй эмес, там салсак да анын бышыктыгына көңүл буруу керектигин табият өзү көрсөтүүдө.

Булак: “Майдан.kg”

Бу “Фейсбук” деген нерсеге кимдер гана кирбейт экен! Билимдүүсү да, билимсизи да, акылдуусу да, акмагы да… Жердешчилик ооруга чалдыккан кээ бир келесоолор башка региондун адамдарына баткак сөздөрдү чапташат имиш.

Жамбыл Камчиевди да ошондой жаман жолго азгырылганын бир гезиттен кабардар болгон соң, биз дароо куудулга телефон чалдык:

– Жамбыл аке, “нарындыктардан Кыргызстандын деңгээлинде ой жүгүрткөн адам жок” деп эмне үчүн айттыңыз эле?

– “Жамбыл ушинтип айтыптыр” деп жалпы нарындыктарга чаптап, мени жаманатты кылышпасын. Ушуну ошол гезитте иштеген калемдештериңе айтып койгула. Мен нарындыктардын элин эмес, саясатчыларын гана ошентип айткамын. Кана, эл үчүн башын сайып иштей турган кимиси бар нарындыктардын? Жок. Бир гана Борончусу бар. Анысы да коркуп калды. Себеби, эң мыкты деп саналып жүргөн Карганбек Самаковун бийликтегилер камап коюшту. Төбөсү көрүнүп калган дагы бирөөсү Семетей Талас уулу деген журналистин сабап салды. Депутаттыкка журналистикадан барган бир айымын түзүк чыкты окшойт деп жүрсөм, анысы бир жаш кызды оозго алгыс сөздөр менен ашата сөккөн турбайбы. И-ий, бетим!.. Анын оозунан чыккан сөздөрдү угуп алып, төбө чачым тик турду.

– Кечиресиз, сиздин төбөңүздө чач бар беле?

– Күч келгенде чач дагы пайда боло түшөт экен. Анан… Азыр сөгүнгөндөргө каршы мыйзам бар. Мыйзамды бузган ар бир адам жоопко тартылышы керек. Балким, жогорку постто олтурган СДПКчылар “өзүбүздүн членибиз” деп жанагы сөгүнчөөк депутатын канаттарына калкалап, “аппак” кылып коюшаар. Карга да баласын “аппагым” дейт эмеспи. Кыскасы, мен нарындыктардын азыркы тыңчыкмаларын эмес, карапайым калкын сыйлайм!

Булак: “Майдан.kg”

Көпчүлүк кыргыз кыздары өз теңин таба албай, жаштыгы менен өмүрү өтүп, айрымдары кытай, түрк, индустарга чыгып кетип жатышы да эркектердин аздыгына барып такалууда. Бирок турмуш менен табият өз өкүмүн жүргүзүп, жашыруун үйлөнүп алган байларыбыз деле жок эмес. Ошондуктан көп никелүүлүккө уруксат берүү маселесин К.Бакиевдин тушунда бир министр көтөрүп, бирок ал төө бастыга кабылган болчу. Эми бул көйгөйду кыргыз кыздар өздөрү көтөрүшүүдө. Ал тургай айрымдары соииалдык тармактарга күйөөлөрүнө ыктыярдуу түрдө жаш аял алып берүүнү айтып жатышат. Алгач тамаша иретинде айтылган көп никелүүлүк маселеси улам чындыкка айланып, кол топтоо демилгеси көтөрүлүп жатат. Эгер алар чындап эле сөздөн ишке өтүп, тиешелүү  колду топтоп, парламенттин кароосуна жөнөтсө, анда мыйзам чыгаруу органы ары же бери кылып чечүүгө милдеттүү. Бирок мыйзам, улуттук менталитетке таянып же куру намыска алдырып, бир эркекти “менчиктештирип алуу” бүгүнкү күндө улутубузду сактап калуу денгээлине айланууда. Себеби ушул боюнча жүрүп отурсак, анда 20-30 жылдан кийин чындап эле ансыз деле аз сандагы кыргыздар ого бетер азайып кетишибиз мүмкүн. Бул мамлекеттин коопсуздугу үчүн да коркунуч жараткан жагдай.

Булак: “Майдан.kg”