Menu

КООМ

Видео - Тургундардын нааразылыгынан кийин казак-орус чек арасына орнотулган тосмолор алынды

Казакстандын Атырау облусундагы чек арага жакын жайгашкан Көптогай айылынын тургундары калктуу конуштун айланасындагы аймактар мыйзамсыз түрдө Орусияга өтүп кетип жатканын билдирип чыгышты.

Соцтармактарга жарыяланган видеолордо тургундар үйлөрүнүн алдына казак чек арачылары зым тартып, тосмолорду орнотуп жатканына нааразылык билдиришкенин көрүүгө болот. Алар буга чейин мал сугарып жүргөн өзөндөгү сууга бара албай калышканын айтышкан.

Казакстандын чек ара маселелери менен алектенген Улуттук коопсуздук комитети Көптогай айылынын жанындагы чек ара сызыгы мыйзамдуу эле жылдырылып жатканын билдирди. Мекеме өкүлүнүн айтымында, Казакстан 2000-жылдары Орусияга таандык узундугу бир жарым чакырым, туурасы 70 метр болгон жерди жаңылыштык менен өзүнө алып алган. Азыр эми ошол жерди кайра кайтарып берүүдө.

Бул жоопко канааттанбаган жергиликтүү тургундар митинг өткөрүп, берилип жаткан жер Казакстанга тиешелүү экенин билдиришкен. Окуя тууралуу өлкөнүн башка аймактарынын жашоочуларына да белгилүү болгондон кийин бийлик шашылыш түрдө тартылган зымдарды, тосмолорду кайра алды.

«Күн мурун жергиликтүү тургундардын нааразылыгын жараткан өзөндүн боюндагы чек ара белгилери алынды. Жашоочулар менен түшүндүрүү иштери жүргүзүлүп жатат. Азыр мал сугаруу жана талааларды сугаруу үчүн өзөнгө барууга жол ачылды. Эч кандай тоскоолдук жок», — деди Көптогай айылы жайгашкан Курмангазы районунун акими Марат Мурзиев.

Ошол эле маалда Улуттук коопсуздук комитетинин өкүлү жаңы чек ара белгилери 2005-жылы кол коюлган казак-орус мамлекеттик чек арасы тууралуу келишимге ылайык орнотулганын, эртеби-кечпи ал ишке ашырыларын белгиледи.

 Булак: “Борбор Азия жаңылыктар кызматы”

«Кемпир-Абад»: Ташиев 50 гектарды 20га азайтууга аракет кыларын айтты

Улуттук коопсуздук боюнча мамлекеттик комитеттин төрагасы Камчыбек Ташиев жер алмашууга нааразы болгон кыргызстандыктардын талабынан улам Ташкентке дагы бир жолу барып келерин айтты.

Ал 19-апрелде “Кемпир-Абаддын” жанынан 50 гектар жерди Өзбекстанга берүүгө каршы чыккан тургундар менен жолугушту.

“Эми мындай кылсак болот, азыр ойлоп жатам. Алар (Өзбекстан – ред.) тосуп алган 20 гектар жерин алмашалы деп айтайын. Элүү эмес, жыйырма гектарды. Мейлиби? 20 гектарды тосуп, калган жерди эле алгыла. Ушул жерден токтойлу, берки жакка чыкпагыла дейин”,- деди Ташиев.

Ташиев тургундардын “Өзбекстан мындай сунушка көнбөй койсочу” деген суроосуна, Ташкентти ынандырууга болгон аракет көрүлөт деген мазмунда жооп берди.

Анын алдында Өзбекстан менен жер алмашууга байланыштуу протоколду Кыргызстан үчүн эң пайдалуу келишим деп атап, буга чейинки жер талаштарга чекит коет деп ишендиргенге аракет кылды. Бирок чогулгандар буга ынаган жок.

Жолугушуу Оштун Кара-Суу районуна караштуу Савай айыл өкмөтүнүн Ынтымак айылында болду.

Кара-Сууга эл менен жолугушууга барган Ташиев нааразылык акциясын уюштургандардын арасында чагым кылууну көздөгөндөр бар экенин да айтты. Чогулгандар анын бул сөзүнө нааразы маанайда жооп кайтарышты.

Жергиликтүү тургандар “Кемпир-Абаддын” жанындагы 50 гектар жердин Өзбекстанга өткөрүлүп берилишине каршы экенин айтышып, 17-апрелде мөөнөтсүз акция башташкан.

УКМКнын жетекчиси Камчыбек Ташиев 30-мартта Өзгөн районунда тургундар менен жолугушуу учурунда “Кемпир-Абад” суу сактагычынын плотинасынын жанынан 50 гектар жер Өзбекстанга берилгенин, анын ордуна Кыргызстан башка аймактан жер алганын айткан.

Жергиликтүүлөр ушул билдирүүдөн улам мөөнөтсүз нааразылык акция баштаган.

18-апрелде Москвадагы кыргызстандык мигранттар да бийликтин чечимине каршылык билдиришкен.

Жер алмашуу аракети быйыл 24-25-мартта Ташкентте чек араны делимитациялоо жана демаркациялоо боюнча өткөн кыргыз-өзбек өкмөт аралык комиссиясынын жыйынынан соң маалым болду.

 Булак: “Борбор Азия жаңылыктар кызматы”

Башкы прокуратура министр Бейшеналиевге каршы арызды карай баштады

Кыргызстандын Башкы прокуратурасы саламаттык сактоо жана социалдык өнүгүү министри Алымкадыр Бейшеналиевге каршы активист Умай Арыкова жазган арызды карай баштады. Бул тууралуу мекеменин басма сөз кызматы билдирип, мындан башка маалымат берген жок.

Умай Арыкова 16-апрелде Бейшеналиевди кылмыш жообуна тартууну өтүнүп Башкы прокуратурага арыз жазган. Ал министрдин уу коргошун боюнча айткандарына укуктук жана юридикалык баа берүүнү талап кылган.

Ушундай эле арызды ал 19-апрелде Улуттук коопсуздук комитетине берген.

Арыкова министрдин аракетине Жазык кодексининин бир канча беренеси менен, анын ичинде «Саламаттыкка атайлап зыян келтирүү» беренеси менен баа берүү керек деп эсептейт.

15-апрелде президент Садыр Жапаров Кыргызстандын дарыгерлери коронавирустан 2-3 күндө айыктырган ыкма тапканын жарыялаган. Көп өтпөй анын социалдык тармактагы расмий баракчаларына бир нече киши атайын аппараттын жардамы менен бөтөлкөлөргө кайнатманы куюп жатканы тартылган видео жарыяланган. Анын сыртында «Уу коргошун» деген жазуу болгон.

16-апрелде Алымкадыр Бейшеналиев брифинг өткөрүп, уу коргошун ушул кезге чейин Кыргызстандагы ооруканаларда жаткан 300 бейтапка берилип, байкоо жүргүзүлгөнүн жана натыйжалуу болгонун айтып чыккан. Журналисттердин алдында уу коргошундун тундурмасын ичип, анын зыянсыз экенин белгилеген.

Медицина тармагында иштеген бир катар адистер жана жарандык активисттер уу коргошундун тундурмасын дары катары колдонуу адам өмүрүнө коркунучтуу экенин айтып, бул аракетти сындап жатышат.

Ал арада «Фейсбук» компаниясы Садыр Жапаровдун COVID-19дан «айыктыруучу дары» тууралуу постун өчүрүп, буга ким болбосун түздөн-түз физикалык залал келтире турган маалыматты бөлүшүүсүнө же COVID-19ду дарылоо же алдын алууга байланыштуу жалган маалыматтарды таратуусуна уруксат берилбей турганын жүйө келтирди. Президенттин басма сөз катчысы Галина Байтерек соцтармактардагы расмий баракчаларындагы билдирүү «тыштан эч кимдин кийлигишүүсүз, жеке демилге» менен өчүрүлгөнүн билдирди.

Латынча Aconítum soongáricum чөбү Кыргызстанда уу коргошун деген аталыш менен белгилүү. Аны рак жана башка ооруларды дарылоодо табыптар колдонуп келген. Бирок ага медицинада тыюу салынган.

Дүйнөлүк саламаттык сактоо уюмунун Кыргызстандагы өкүлчүлүгү уу коргошун коронавирусту дарылоодо натыйжалуу деген маалыматтарды четке какты.

 Булак: “Борбор Азия жаңылыктар кызматы”

Ошто мектеп имаратынын бөлүгүнөн өрт чыкты

Ошто мектеп имаратынын бөлүгүнөн өрт чыкты. Бул тууралуу ӨКМдин басма сөз кызматы билдирет.

Маалыматка ылайык, Ош шаарынын  Гапар Айтиев   көчөсүндө  жайгашкан  Керме-Тоо  орто  мектебинин  биринчи кабатындагы  Ош шаардык мэриясына караган көп тармактуу үй-бүлөгө жана балдарга жардам берүү борборунун социалдык бөлмөсүнөн өрт чыккан.

Өрттүн  чыккан  мезгили саат 11: 40 чамасында  болуп, өрт  болгон жерге № 12  Ош шаардык  өрткө каршы куткаруу бөлүгүнөн   бир бөлүмчө тартылган.  Өрт Саат 11: 55те  чектелип, 12:01 де  толугу  менен  жоюлган.

Өрттүн келип чыгуу  себеби:  электр чубалгыларын туура эмес пайдалануудан келип чыккан.

Өмүрбек Суваналиев: "Ар бир жоокер мекенге кызмат кылуунун жогорку үлгүсүн көрсөтүүгө тийиш"

КРнын Өкмөтүнүн Баткен облусундагы ыйгарым укуктуу өкүлү Өмүрбек Суваналиев КРнын “Жоокерлердин энелери” комитетинин төрайымы Уулкан Байгубатова менен жолугушту. Бул тууралуу КРнын Өкмөтүнүн Баткен облусундагы ыйгарым укуктуу өкүлүнүн басма сөз кызматы билдирди.

Жолугушууда тараптар Баткен облусунун аймагында кызматтык милдетин өтөп жаткан аскер кызматкерлеринин, жоокерлердин жашоо  турмушу, мамлекет тарабынан көрсөтүлүп жаткан камкордуктар, алардын муктаждыктарын чечүү жана коопсуз шарттарды түзүү маселелерин сүйлөшүштү.

Өмүрбек Суваналиев өз сөзүндө Баткен облусу чек аралаш, стратегиялык мааниге ээ болгон аймак экенин белгилеп, аймактын өнүгүүсү үчүн биринчи кезекте тынчтык, коопсуздук жана туруктуулук керек. Баткенде, өз милдеттерин ак ниеттүүлүк менен аткарган, чыныгы мекенчил эр азаматтар кызмат өтөөрүн, алардын кызмат башка аймактарга салыштырмалуу жооптуу экенин белгиледи.

Ошондой эле ар бир жоокер бакубат жана коопсуз жашоого татыктуу. Кандайдыр бир өз кызыкчылыгын көздөгөн күчтөрдүн айынан, бир дагы жоокер жабыркабашы керек  деди.   

Өзбек имамдары чет өлкөлүк сериалдарды көрсөтүүгө тыюу салууну сунушташты

Ташкенттин Юнусабад районундагы мечиттердин имамдары телеканалдардан «моралдык жактан жергиликтүү менталитетке туура келбеген» сериалдар менен кинотасмаларды көрсөтүүнү токтотууну сунушташты. Бул тууралуу аталган райондук акимчиликтин басма сөз кызматы билдирди.

Маалыматка караганда, имамдар бул сунушун жаш түгөйлөрдүн ажырашуусуна арналган жолугушуу учурунда айтышкан. Район башчысы Жахонгир Ибрагимов катышкан иш-чаранын жүрүшүндө алар никеге туруп жаткан жаштарга үч айлык сабактарды өткөрүүгө даяр экендиктерин айтып, мектеп программасында өзүнчө сабак катары үй-бүлөлүк концепцияларды окутууну сунушташкан.

Бул Өзбекстанда чет өлкөлүк сериалдарды көрсөтүүнү токтотуу боюнча алгачкы чакырык эмес.

Буга чейин өлкөнүн айрым диний ишмерлери түрк сериалдарына каршы пикирлерин билдиришкен.

«Аялдар менен кыздар түрк сериалдарындагы келишимдүү жигиттерди ойлоп жүрүшөт. Социалдык түйүндөрдө тиги же бул актерду түш көргөнүн жазган кыздар көп. Күйөөсү бар аялдар түрк актерлорунун сүрөттөрүн көтөрүп жүрүшөт. Бул кумсалардын төрөлүшүнө алып келет. Анткени аял жолдошу менен жыныстык катнаш учурунда башка эркекти элестетсе, алардан кумсалар төрөлөт. Ошондой эле эгер эркек башка аялды элестетсе, лесбиянкалар төрөлөт», — деген 2018-жылы Ташкенттеги «Мирза Юсуф» мечитинин имамы Рахматуллох Сайфутдинов.

 Булак: “Борбор Азия жаңылыктар кызматы”

Президент Садыр Жапаров Түркмөнстандын Президенти Гурбангулы Бердымухамедовго атасынын каза болгонуна байланыштуу көңүл айтты

Кыргыз Республикасынын Президенти Садыр Жапаров Түркмөнстандын Президенти Гурбангулы Бердымухамедовго атасынын каза болгонуна байланыштуу көңүл айтты. Бул тууралуу президенттин аппаратынын басма сөз кызматы билдирет.

«Атаңыз Мяликгулы Бердымухамедовичтин дүйнөдөн мезгилсиз кайткандыгы тууралуу суук кабарды кайгыруу менен кабыл алдым. Кыргызстан элинин жана жеке өзүмдүн атымдан Сизге жана боордош Түркмөнстан элине көңүл айтуу менен орду толгус жоготуу азасын тең бөлүшөм», — деп айтылат Мамлекет башчысынын кайрылуусунда.

Навальныйдын тарапташтары 21-апрелде митингдер өтөрүн билдиришти

21-апрелде Орусиянын бир катар шаарларында абактагы оппозициячыл саясатчы Алексей Навальныйды колдогон ири митингдер өтөт. Бул тууралуу маалымат Навальныйдын расмий сайтына 18-апрелде жарыяланды.

Билдирүүдө саясатчынын саламаттыгы тездик менен начарлап жатканы, мындан ары кол куушуруп отурууга болбой калганы белгиленген.

«Азыр Навальный колонияда, анын өмүрү кыл учунда турат. Анын саламаттыгына байланыштуу олуттуу маселелер бар. Ага дарыгерди киргизбей жатышат. Ал бир канча аптадан бери медициналык жардам көрсөтүлүшүн талап кылып, ачкачылык кармап жатат. Канчага чейин чыдай аларын билбейбиз», – деп жазылган анда.

Буга чейин Навальныйдын жеке дарыгери Анастасия Васильева баштаган үч доктур Орусиянын Федералдык жаза аткаруу кызматына кайрылып, оппозициячыл саясатчыны дарылоого мүмкүнчүлүк берүүнү өтүнүшкөн. Алар Навальныйдын абалы соңку бир нече күндүн ичинде кескин начарлап кеткенин, анын жүрөгү кармап калышы мүмкүн экенин эскертишкен.

Жубайы Юлия 13-апрелде билдиргендей, Алексей Навальный Москвадан 100 чакырым алыстыктагы Покров шаарындагы №2 колонияга жөнөтүлгөндөн бери 17 килограммга арыктаган. Буга чейин түрмө жетекчилиги Навальныйдын абалын «канааттандырарлык» деп мүнөздөгөн.

Орус президенти Владимир Путинди сындап келе жаткан 44 жаштагы Алексей Навальный былтыр август айында Сибирдеги Томск шаарында ууландырылып, Германияга жеткирилген. Ал нерв системасын шал кылуучу «Новичок» уулуу заты менен ууландырылганы кабарланган. Орус бийлиги мындай маалыматты четке каккан.

Навальный Берлиндеги клиникадан дарыланып чыгып, 17-январда Москвага кайтканда камакка алынган жана 2014-жылкы кылмыш иш боюнча «шарттуу жазанын эрежелерин сактаган жок» деген негиз менен 2,5 жылга эркинен ажыратылган.

Булак: “Борбор Азия жаңылыктар кызматы”

Абхазиядан ташылган автоунаалардын ээлери кайра митингге чыгышты

Абхазиядан ташылган автоунааларды Кыргызстанда каттап, мыйзамдаштырып берүүнү мамлекеттик органдардан талап кылгандар 19-апрелде кайрадан Бишкекте митингге чыгышты. Алар колдоруна плакат кармап, Өкмөт үйүнүн алдында – Турдакун Усубалиев атындагы аянтта турушат.

«Эркин Европага» «Телеграмдан» жөнөтүлгөн видеодо алардын премьер-министрдин фамилиясын айтып, кыйкырып турушканын көрүүгө болот.

Ушундай эле акция март айында да эки жолу өтүп, алар президент Садыр Жапаровдун атына кайрылуу жолдошкон.

Бул маселе 19-апрелде Жогорку Кеңештин Бюджет жана финансы комитетинде да көтөрүлдү. Мамлекеттик бажы кызматынын төрагасы Кадыржан Семетеев Абхазиядан машинелер буга чейин жемкорлук жол менен өлкөгө киргенин, ошого байланыштуу текшерүү күчөгөнүн билдирди:

«Алып келишкенде товар катары алып келет. «Тетикке бөлүп сатабыз» же «коллекциялык негизде» деп көрсөтүшөт. Азыр Салык кызматы, Ички иштер министрлиги эсебин тактоодо. Коррупциялык иштер боюнча Ички иштер министрлигине маалымат берилген, алар иштеп жатышат», деди Семетеев.

Депутат Бакытбек Райымкулов Абхазиядан келген автоунааларды сатып алгандарга каршы эмес, машине ташыгандарга каршы чара көрүүнү сунуш кылды.

Өткөн айда Мамлекеттик бажы кызматы жарандарга кайрылып, Абхазиядан алып келинген унааларды сатып алуудан жана бажы каттоосунан өткөрбөй туруп пайдалануудан карманууга чакырган. Расмий маалыматта жазылгандай Абхазиядан ташылган унаалар ЕАЭБдин товары болуп эсептелбейт.

Ошондон кийин Бажы кызматы Жол кыймылынын коопсуздугун камсыздоо башкармалыгы (ЖКККБ) менен биргеликте рейд жүргүзүп, Убактылуу бажы декларациясы жок же декларациясынын мөөнөтү өтүп кеткен автоунааларды камакка ала баштаган.

1992-жылы Грузиядан бөлүнүп өз алдынчалыгын жарыялаган Абхазияны мамлекет катары дүйнөнүн көпчүлүк өлкөлөрү, анын ичинен Кыргызстан да тааныган эмес.

 Булак: “Борбор Азия жаңылыктар кызматы”

Тажикстанда YouTube аркылуу онлайн-лотерея өткөргөн блогерлер лицензия алууга милдеттендирилет

Тажикстандын Каржы министрлиги блогерлердин YouTube аркылуу онлайн-лотереяларды өткөрүп жатышы мыйзамсыз экенин, бул үчүн алар расмий уруксат алышы керектигин билдирди.

«Онлайн-лотереялардын уюштуруучулары Каржы министрлигинен тиешелүү лицензия алышы керек, болбосо алар мыйзамсыз ишкердик үчүн жоопкерчиликке тартылат», — деди министрликтин юристи Бахром Сатториён.

Ал мекеме мыйзамга өзгөртүүлөрдү сунуштап жатканын, ага ылайык онлайн-лотерея өткөрүү үчүн блогерлер Каржы министрлигинен расмий уруксат алууга милдеттүү болушарын кошумчалады.

Акыркы айларда тажикстандык блогерлер жапырт түрдө YouTube-каналдары аркылуу онлайн-лотереяларды өткөрө башташты. Байге катары автоунаалар, смартфондор, акча жана батирлер сунушталып жаткан лотереялардын билет баасы 100-200 сомониден сатылууда.

Быйыл февралда Тажикстандын Салык комитети жергиликтүү блогерлерди социалдык түйүндөрдөгү жана YouTube сервисиндеги кирешелери үчүн салык төлөөгө милдеттендирген. «Блогерлер 1-апрелге чейин каттоого туруп, социалдык түйүндөр менен YouTube порталынан түшкөн кирешелери боюнча салык төлөй башташы керек. Болбосо алардын аракети мыйзам бузуу болуп калат», — деп билдирген мекеме башчысы Шамсулло Кабирзода.

Анда тажик блогерлери кирешелери көп деле эмес экенин айтып, салык төлөй албай тургандыктарын, болбосо социалдык түйүндөрдөгү баракчаларын жабууга аргасыз болушарын билдиришкен.

 Булак: “Борбор Азия жаңылыктар кызматы”

Меню