Menu

КООМ

Эдил Байсалов “Азаттык" радиосунун ишмердигин “Тап-таза бузукулук!” деп уяткарды

КР Министрлер кабинетинин төрагасынын орун басары Эдил Байсалов өзүнүн Тwitter социалдык тармагындагы баракчасында “Азаттык” радиосун кескин сынга алды.

“Мына эми карагылачы. Стандарттын стандарты дегендердин кылганын. “Эмнеси болсо да өнүгүү болбосун! Мамлекетке каршы чыккандын баары таза! Өкмөттүкү дайым туура эмес” деген логиканын кесепети. Токтоткула мындайыңарды. Бул эркиндик эмес. Тап-таза бузукулук!” – деп жазды Эдил Байсалов.

“Бул жердеги маскаралык бул “Азаттык радиосундагы” биз жогорку деңгээлдеги кесипкөйлөр деп эсептегендер тирешүү жана карама-каршы коюу максатында бир сөзмөрдүн эки жыл мурунку эски видеосун жаңы жаңылык катары жарыялоону чечкендиги. Бул аталган редакциядагы жана жалпы басма сөздөгү жакшы эмес ситуациянын реалдуу иллюстрациясы”, – дейт Байсалов.

Эсиңиздерге сала кетсек, 14-август күнү Facebook социалдык тармагынын колдонуучусу Ырыс Жекшеналиев өзүнүн “Полит Узник” баракчасында абактан араң кутулган УКМКнын мурунку төрагасы Абдил Сегизбаевдин 2 жыл мурунку Жетим-Тоо боюнча видеосун жаңы жаңылык катары жарыялаган. Аны аңдабай “Азаттык” радиосу да жаңы жанылык катары “Сегизбаевдин Жетим-Тоодогу кенди иштетүүгө каршы пикири жарыяланды” деп элге жар сала баштаган.

Эдил Байсаловдун уяткаруусунан кийин “Азаттык” өз жаңылыгын алып салган.

Курманкул Зулушев, Генпрокурор: "Кыргыз мамлекетинин келечеги десек бөлүнгөндү, трайбализмди, жердешчиликти токтотолу"

Башкы прокурор Курманкул Зулушев, Министрлер Кабинетинин Төрагасынын орун басары Бакыт Төрөбаев Чүй районунун жана Токмок шаарынын тургундары менен жолугушту.

Жыйында, жарандар укук коргоо органдарынын ишмердүүлүгүнө байланышкан жеке көйгөйлөрүн, коомчулукта орун алган айрым мыйзам бузуучулуктар тууралуу айтышып, тийиштүү чара көрүп берүүнү сурашты.

Башкы прокурор ар бир кайрылуу жоопсуз калбастыгын белгилеп, мыйзам чегинде чукул арада чаралар көрүлөөрүн убадалады.

“Кыргыз мамлекетинин келечеги десеңер бөлүнгөндү, трайбализмди, жердешчиликти токтотолу”, – деп чакырды КР Генпрокурору Курманкул Зулушев.

Жолугушууга Чүй районун жана Токмок шаарынын 500гө жакын тургуну катышты.

 

Кыргызстандын эң алыскы Зардалы айылы интернетке туташты

Баткен облусунун тоо боорундагы алыскы Зардалы айылына интернет орнотулду. Аны Кыргыз Интернет Коому ишке ашырып, уюмдун инженери Ибрахим Халил Билгич бир нече күн-түндүк эмгектенүүдөн кийин «Зардалыда интернет абдан жакшы ылдамдыкта иштеп жатат, жергиликтүүлөрдүн кубанычында чек жок» деп билдирди.

Зардалы Кыргызстандын эң алыскы Баткен облусунун бийик тоолуу айылы. Айылдын кышы абдан катаал, электр жарыгы жок экенинен сырткары, эч кандай логистикалык жолдорго байланышпаган, башка айылдар менен туташтырган жалгыз кууш жана таштак жолду жыл сайын бир нече ирет сел алат. Мындайда Зардалынын тургундары байланышсыз калып, өзгөчө кырдаал учурунда медициналык жардамга жете албай, кээде аялдар төрөтканага жетпей жолдон көз жарган окуялар катталып турат.

UNICEFтин GIGA Accelerate долбоорунун алкагында Кыргыз Интернет коому Зардалыда алгач күн панелин орнотуп, ал айылдын чакан мектебин электр жарыгы менен да камсыз кылып жатат. Бул окуучулардын райондук же шаардык мектептер, мекемелер менен байланышта болуп, сапаттуу, заманбап билим алуусуна өбөлгө түзөт. Андан сырткары, бүт айылды, керек болсо кошуна айылдарга чейин электр жарыгы менен камсыз кыла алат. Ошондой эле түрдүү кырдаалда райондук борбор менен түз байланышта боло алышат.

Бул аркылуу Кыргыз Интернет Коому UNICEFтин GIGA Accelerate долбоорунун алкагында Жашыл экономиканы колдонуп, мектептерге электр жарыгын, интернетти туташтырып, туруктуу өнүгүүнүн жаңы моделине аракет жасоодо.

Project Connect берген маалыматка ылайык, Кыргызстандагы 2080 мектептин 2061и интернетке кошулган жана мектептердин бир пайызы гана интернетсиз отурат. Ушул бир пайызга кирген мектептердин көбү Зардалы сыяктуу жетүүгө оңой болбогон аймактарда, Кызыл-Ой жана Эңилчек сыяктуу алыскы жана тоолуу айылдарда жайгашкан.

Биз жергиликтүү акимиатка, чек ара кызматына, UNICEF уюмуна жана Интернет коомунун (ISOC) Башкы кеңсесине ыраазычылык билдиребиз.

Талибдер Кабулда аялдардын "Нан, жумуш, эркиндик" деген ураан менен чыккан тынч акциясын күч менен таратты

“Талибан” кыймылынын жоочулары “Нан, жумуш, эркиндик” деген ураан менен Кабулдун көчөлөрүнө демонстрацияга чыккан аялдарды күч менен таратты.

13-августта 40ка жакын аял укуктары жана эркиндиктери чектелип жатканына каршы наарызылык акциясын өткөрүү үчүн Билим берүү министрлигинин алдына чогулушкан.

Соцтармактарга жарыялаган видеолордон “Талибандын” жоочулары асманга ок атып жатканын көрүүгө болот. Чогулгандар кача баштаганда алар аялдарды кууп жетип, автоматтардын кундагы менен урушкан.

Ооганстандагы көз карандысыз журналисттердин бирлиги акцияны чагылдырып жүргөн үч чет өлкөлүк жана бир жергиликтүү журналист кармалганын, дагы эки жергиликтүү журналист жараат алганын билдирди.

Amnesty International эл аралык уюму талибдер тынч акцияны таркатуу үчүн “ашыкча күч колдонгону” тууралуу маалыматтарга байланыштуу тынчсыздануусун билдирди. Уюм “Твиттердеги” баракчасына “аялдар болгону тынч акция өткөрүп, өз укуктарынын сакталышын талап кылганын” жазды.

Былтыр 15-августта Ооганстандагы бийликти басып алгандан кийин “Талибан” аялдар менен кыздардын иштөөгө жана окууга болгон укуктарын чектеген. Ошол эле маалда талибдер түзгөн өкмөттүн мыйзамдарына ылайык, аялдар көчөдө жүзүн толук жаап жүрүп, үйдөн күйөөсүнүн же жакын эркек тууганынын коштоосусуз чыкпашы керек.

Азырынча талибдердин бийлигин дүйнөдөгү бир да өлкө тааный элек. Эл аралык коомчулук бул үчүн “Талибан” өлкөдө инклюзивдүү өкмөт түзүп, аялдар менен кыздарды негизги укуктар жана эркиндиктер менен камсыз кылышы керек экенин билдирип келет.

Президент Садыр Жапаровдун Жетим-Тоо темир кени боюнча элге кайрылуусу

Урматтуу кыргызстандыктар!
Жакындан бери социалдык түйүндөрдү карасам, Жетим-Тоону “коргогучтар” болуп чыга келген жарандарыбыз элге кайрылуу кылып, өздөрүн “баатыр” көрсөтүп, элди “көтөрүлгүлө” деп чакырык жасап жатышыптыр.
Ушундан улам элге толук маалымат берип коюуну туура көрдүм.
Эсиңиздерде болсо, президенттик шайлоодо “Эгер Жетим-Тоону 100 пайыз өзүбүз иштете турган болсок, сырткы карызыбызды Жетим-Тоо эле жаап коет” деп айткан сөзүм бар. Бирок азыр Жетим-Тоону иштетели деген эч ким жок.
Сырткы карызыбызды башка булактарыбыз менен эле жаап жатабыз жана жабабыз.
Мындан ары күчүбүз жетет.
Андан сырткары эмгек акы, пенсия, жөлөкпулдарды дагы көтөрө баштадык.
“Кумтөр” мурда 5-6 миллиард салык төлөп келсе, “ай-иий ай, Кумтөр бизди багып атат” деп сүйүнүп, этегине намаз окуп келгенбиз. Былтыртан бери, керек болсо, 50-60 миллиард салык жана башка төлөмдөрдү төлөп келе жатат. Ошонун эсебинен эмгек акыларды, пенсия, жөлөкпулдарды көтөрүп жатабыз.
Эгер Жетим-Тоону иштетип калсак, 100 пайыз өзүбүз иштетебиз.
Бир пайыз эмес, бир муштум ташын эч кимге үлүш катары бербейбиз.
Бирок бүгүн Жетим-Тоону иштетели деген даярдыгыбыз жок.
Жөн гана геология иштерин жүргүзүп, запасын тактап койгула деген буйрук берилген.
Союз мезгилинде болжол менен изилденген запасы бар экен. Бирок корунун так көлөмү жок болгондуктан, тактап коелу деп, Кыргызгеология кызматкерлери иш жүргүзүп жатышат.
Тактап койсок, биз иштетпесек, келечек муун иштетет.
Анан эле өздөрүн “баатыр” көрсөткүсү келип, “Жетим-Тоону экинчи Кумтөр кылбайбыз” деп кыйкырып чыгышкандарын кантейин деле.
Эч нерсе боло электе эле билип-билбей, “Жетим-Тоону берип атышат” деп калп айтып, элдин башын айлантканды токтоткула.
Айтпаса, адамдын жанын кашайтасыңар да.
Ошол эле “Кумтөр” кетип жатканда, силер бийликте болчусунар. Болгондо да бийликтин эң чоң бутагы, мамлекеттин коопсуздугуна жооп берчү бийликтин башында олтургансыңар. Ошондо да “Кумтөрдү” кайра алмак түгүл, бир доллар штраф төлөтө алган эмессиңер.
Азыр “Кумтөр” жүз пайыз өз элибизге өтүп, өмүрү эмгек акыга жарыбаган мамлекеттик кызматкерлерибиз жыргап олтурушат. Жолдор оңдолуп жатат. Мектептер салынып жатат. Дагы кандай иштер жүрүп жатканын силер көрбөй жатсаңар, жалпы эл көрүп турат.
Эгер Жетим-Тоону иштетсек, мындан бетер эмгек акылар көбөйөт, экинчи “Кумтөр” болот, ошол эле Нарын облусунун, ошол эле Жетим-Тоонун тегерегинде жашаган элдердин турмушу оңолот. Инфрастуктурасы оңолуп, керек болсо, айылдарынын ичине чейин асфальт басылат. Бирок дагы бир жолу кайталап коеюн. Жетим-Тоону иштетебизби- жокпу, азырынча чечим кабыл алына элек. Иштете турган болсок эл менен макулдашып, анан 100 пайыз өзүбүз иштетебиз. Эл “жок” десе, анда – жок.
Бирок бир нерсени унутпагыла. “Алма быш – оозума түш, мени бекер эле “суф” деп байытып, турмушумду оңдоп жибер” деп жата берсек, асмандан бирөө каражат бербейт. Мектептер салынбайт. Жолдор оңдолбойт. Эмгек акылар көтөрүлбөйт. Инфраструктураларыбыз оңолбойт. Кыскасы, өнүкпөйбүз. Бир нерсе кылайын десек эле, “муну кылба, тигини кылба, туризм менен эле өнүгөбүз” деп чыгышат. Туризмди өнүктүрөйүн десең, “баланча өлкөнүн кишилери басып кетти, кокуй киргизбегиле” деп чыгышат. Деги биздин элге “эмне жагат?” деген суроо бергиң келет.
Мындан ары мен президент болуп турган убакта “Кумтөр”, Жетим тоо жана башка ушул сыяктуу ири кендер эч кимге берилбейт.
Мага чейин берилип кетип иштеп жаткан ири кендерге болсо мамлекеттин үлүшүн киргизебиз. Убакыт керек.
Ошондуктан өздөрүн “баатыр” көрсөткүсү келип жаткан “лжепатриоттор!”, Жетим-Тоону бирөөлөргө берген жатат деп, калп айтып, элдин башын жөнү жок айлантпагыла.
Тартип сактоо органдары, ушундай арам ою бар “лжепатриоттор”, калпычылар менен тартипке чакыруу иштерин алып баргыла. Эмне үчүн элге туура эмес маалыматтарды таратып жатышат?

УКМКнын тергөө абагында каза болгон фактыларды иликтеген комиссия ишин аяктады

УКМКнын СИЗОсунда болгон учурда каза тапкан Бакыт Асанбаев менен Марат Казакпаевдин өлүмүнүн фактыларды иликтөө боюнча жумушчу комиссия ишин аяктады.

Көрсөтмөгө ылайык, комиссия мүчөлөрүнө УКМКнын тергөө абагынын имаратына кирүүгө, тергөө амалдары жүрүп жаткан камакка алынгандардын өздүк делолору, видеокөзөмөлдөөлөрдүн жазуулары менен танышууга,  ошондой эле УКМКнын кызматкерлери, тергөө абагында кармалып турган адамдар менен байланышууга толук мүмкүнчүлүк түзүлдү.

Комиссия өз ишинин жүрүшүндө 12 отурум өткөрсө, анын  беши УКМКнын СИЗОсунда, жетөө Өкмөт үйүндө болду.

Кыргыз Республикасынын Министрлер Кабинетинин Төрагасынын орун басары – Кыргыз Республикасынын Улуттук коопсуздук мамлекеттик комитетинин төрагасы Камчыбек Ташиевдин маалыматы угулуп, Б. Асанбаев менен М.Казакпаев камакта болгон учурдагы СИЗОнун байкоочу камералардагы жазуусу, тергөө абагынын эсеп-кысап документтери көрүлдү. Аны менен катар каза болгон адамдар менен чогу кармалгандар, СИЗОнун кызматкерлери суралып, бул кылмыш иштерин тергеген УКМКнын Башкы тергөө башкармалыгынын тергөөчүлөрү менен баарлашуу болду.

Жүргүзүлгөн иштердин жыйынтыгы боюнча комиссия Б.Асанбаев менен М.Казакпаевдин күтүүсүз өлүмүнө алып келген жагдайлардын трагедиялуу айкалышы жөнүндө алдын ала корутундуга келди.

Ушундай иштердин кайталанбашы учун комиссия зарыл чаралардын комплексин сунуш кылды.

«Министрлер Кабинети мамлекет башчысынын тапшырмасы менен убактылуу кармоочу жайды, СИЗОну жана бардык пенитенциардык системаны толугу менен кайра түзүүнү пландаштырууда. Жакынкы жылдарда бул маселе коомду гумандаштыруунун, тергөө абагынын жана жаза өтөө жайларынын шарттарын жакшыртуунун алкагында эң артыкчылыктуу багыттардын бири болот», – деди – комиссиянын төрагасы Эдил Байсалов.

Темир Сариев менен Юруслан Тойчубеков Жетим-Тоо кенинин башчылыгын талашып жатышыптыр

Кыргыз өкмөтү Жетим-Тоо темир кенин иштетүү боюнча аракеттерин баштагандан бери эски чиновниктер түн уйкусунан качып, канткенде мындай “майлуу-сүттүү” жердин гендирекциясын ээлеп калуу жандалбасын кылышууда.

Алардын бири Темир Сариев 2020-жылы президент Садыр Жапаровдун колтугуна кире коюп, анан Садыр Жапаров 2020-жылдын 18-декабрында эл менен жолугушууда “Жетим-Тоо” темир кенин өзүбүз казабыз, анын запасы 500 жылга жетет.  Жетекчилигине Темир Сариевди жумшап жатабыз” деп жарыя кылган.

Бирок 2021-жылдын 3-августунда УКМК экс-премьер Темир Сариевди “Кумтөр” алтын кениндеги коррупцияга айыптап камакка алып, Сариевдин тилеги таш капкан.

Эсиңиздерге сала кетсек, 2016-жылы 5-11-апрелдерде да КР Жогорку Кеңеши жана КР Транспорт министри ошол кездеги премьер-министр Темир Сариевди  кытайлык жол куруучу «Лонг Хай» компаниясынан 6 млн доллар пара алган деп айыптап, кызматтан кетиришкен.

2021-жылдын 22-ноябрында үй камагына чыгарылган Темир Сариев бүгүнкү күндө Ак үйдүн лөктөрүнө киши салып, Жетим-Тоону сурап жүргөнү белгилүү болду. Алтургай жакында Нарынга саякат деген шылтоо менен Жетим-Тоо темир кенине алыстан көз салып келгени да айтылууда.

Ошол эле учурда дагы бир экс-чиновник, 2015-жылы “эшек бизнеси” жана “Элдик лотерея” чуулгандуу бизнестери менен белгилүү болгон Юруслан Тойчубеков да Жетим-Тоо темир кенинин гендирекциясына көзү түшүп, чуркап жүргөнү эл арасына тарап кетти.

Жетим-Тоо темир кенинин башчылыгы үчүн эки эрендин күрөшүндө ким жеңерин убакыт көрсөтөт.

Нурсултан Назарбаев Нур-Султанда аянты 10 гектар Борбор Азиядагы эң ири мечитти ачты

Бүгүн, 12-августта Нур-Султанда Борбор Азиядагы эң ири  мечит ачылды. Аны өлкөнүн мурунку президенти Нурсултан Назарбаев ачты.

“Мечит жайгашкан жер 10 гектар. Күмбөздүн бийиктиги 83,2 метр, диаметри 62 метр. Мечиттин төрт мунарасы бар Ар биринин бийиктиги 130 метр”, – деп жазады Informburo.kz.

Бул жерде бир учурда 30 миң адамга чейин намаз окуй турган орун бар. Мечиттин алгачкы ташын 2019-жылы март айында Назарбаев отставкага кеткен күнү өзү койгон.

Назарбаев мечиттин ачылуу аземи учурунда “бул жеке жарандар менен инвесторлордун эсебинен салынган фундаменталдуу мечит” экенин айтты.

Мечиттин ачылышына Назарбаев бийликте кезде айланасында жүргөн кишилер келген. Арасында Казакстандын мурдагы премьер-министри Аскар Мамин, экс-сенатор Куаныш Султанов Жамбыл жана Алматы облустарынын мурунку акимдери Бердибек Сапарбаев менен Амандык Баталов бар.

Казакстанда эстеликке Z белгисин тарткан адам жети суткага камалды

Казакстандын Караганды облусунун Саран шаарынын соту танк-эстеликке Z белгисин койгон адамды жети суткага камады. Бул тууралуу казак маалымат каражаттары жазды.

Маалыматка караганда, шаар тургуну 29-июлда Экинчи дүйнөлүк согушта талкаланган танктын эстелигине Z белгисин тарткан. Ага “Майда бейбаштык” беренеси менен кылмыш иши козголгон. Сот чечимди чыгарууда шектүү айыбын моюнуна алганын жана өкүнгөнүн айтканын эске алган.

29-июлда Караганды облусунун милициясы Саран шаарынын 54 жаштагы тургуну кармалганын маалымдаган. Бул иш административдик укук бузуу катары каралган. Танктагы символ сырдалып өчүрүлгөнү менен сүрөт социалдык тармактарга тарап кеткен.

Z жана V тамгалары Украинага басып кирген орусиялык техникаларга тартылган. Кремлчил пропагандачылар аларды “атайын операциянын” символдору деп аташат. Кремль үгүт иштеринде бул символдорду көп колдонот.

Казакстан сөз болуп жаткан символдорго расмий тыюу салган эмес. Бирок буга чейин Казакстанда автоунаалардагы Z белгиси бар айрым айдоочуларга айып пул салынган. Ушундай эле окуялар Кыргызстанда да болгон.

Балдардын жыныстык кол тийбестигине, өмүрүнө жана ден соолугуна каршы аракеттер үчүн күнөөлүүлөрдүн жоопкерчилигин күчөтүүнү караган КР Кылмыш-жаза кодексине өзгөртүүлөр киргизилди

Бүгүн, 11-августта Кыргыз Республикасынын Президенти Садыр Жапаров «Кыргыз Республикасынын айрым мыйзам актыларына Кыргыз Республикасынын Кылмыш-жаза кодексине», «Мунапыс берүү негиздери жана аны колдонуу тартиби жөнүндө» Кыргыз Республикасынын Мыйзамына өзгөртүүлөрдү киргизүү тууралуу Кыргыз Республикасынын Мыйзамына кол койду.

Мыйзам Кыргыз Республикасынын Жогорку Кеңеши тарабынан 2022-жылдын 30-июнунда кабыл алынган.

Бул Мыйзам балдарды коргоо жаатында реформаларды ишке ашыруунун алкагында кол коюлган жана жыныстык кол тийбестигин коргоого болгон укуктарын, ошондой эле балдардын өмүрүн жана ден соолугун кылмыштуу кол салуулардан коргоону камсыз кылууга багытталган.

Мыйзамга ылайык, балдардын жыныстык кол тийбестигине жана руханий адеп-ахлактык саламаттыгына каршы кылмыш жасагандыгы үчүн эркинен ажыратуу мөөнөтү жана айыптын өлчөмү көбөйтүлөт.

Мындан тышкары, жогоруда көрсөтүлгөн кылмыштарды жасаган адамдар жазык жоопкерчилигине тартуунун эскирүү мөөнөтү аяктагандыгына байланыштуу (58-берене), психикалык ооруга чалдыккандыгына же психикасынын убактылуу бузулушуна байланыштуу, ошондой эле шарттуу түрдө мөөнөтүнөн мурда бошотууну колдонуу жолу менен кылмыш-жаза жоопкерчилигинен бошотулбайт. ( 89-берене) жана мунапыс.

Меню