КРнын ИИМдин КМКнын мүлктүк кылмыштар менен күрөшүүнү уюштуруу боюнча бөлүмүнүн кызматкерлери аймактык бөлүктөр менен биргеликте республиканын айрым аймактарында мал уурулук менен алектенип жүргөн шектүүлөрдү кармашты. Бул тууралуу бүгүн, 3-декабрда ИИМдин басма сөз кызматы билдирди.
Маалыматка караганда, мал уурулардын кылмыштуу аракеттеринен Нарын, Ысык-Көл жана Чүй облусунун жашоочулары жабыр тарткандыгы маалым болгон. Кылмыштуу топтордун курамында мурда соттолгон жарандар болгон. Айрымдары эки-үч ай мурда эркинен ажыратуу жайынан чыккан.
Алар бири-бирине маалымдап, кароосуз калган малдарды табышып, аларды автоунаага жүктөп, тезинен изин жашырып кетип жүрүшкөн. Уурдалган малдардын көбүн базарларда сатып жүрүшкөндүгү жана уурдалган малдарды сатып алган жана кайра сатуу менен алектенгендер дагы аныкталган. Өздөрүнүн укукка каршы аракеттери менен бир нече региондун жашоочуларына маанилүү чыгым келтиришкен.
ИИМдин Криминалдык милиция кызматынын маалыматы боюнча Чүй облусунда малды сатып алып өткөрүүчүлөргө ЖАМКтын мекемелеринде жаза мөөнөтүн өтөп жатышкандар дагы чалып жүрүшкөн.
Соттолгондор ири суммада акча каражатын карыз болуп калган адамдарга жардам берүү үчүн уйларды жана жылкыларды сатып алууну сунуштакан. Бул факты кылмыштуу ишмердүүлүккө жаза мөөнөтүн өтөп жаткандар дагы тартылгандыгын билдирет.
Кылмыштуу топтордун эсебинде Кочкор, Ат-Башы, Жети-Өгүз, Тоң, Кемин жана Жайыл райондорунун аймагында бир катар уурдалган ири мүйүздүү малдар жана жылкылар бар болгон. Шектүүлөр 15 кылмыш ишин жасоого шектелүүдө. Алар 15 ашык ири мүйүздүү малды жана 5 жылкыны уурдашкан. Бул болжолдуу гана маалыматтар.
Азыркы учурда ыкчам кызматкерлер мал уурулук менен алектенген эки кылмыштуу топтун 6 мүчөсүн кармашкан. Алар 21 жаштан 28 жашка чейинкилер. Бардыгы мурда соттолгондор. Ысык-Көл, Нарын, Жалал-Абад облустарынын жашоочулары. Бирөөсүн ЖАМКтын тергөө органы издеп жүргөн.
Шектүүлөрдү кармоону КРнын ИИМдин КМКнын мүлктүк кылмыштар менен күрөшүүнү уюштуруу боюнча бөлүмүнүн жана Нарын ОИИБдин КМКнын, Кочкор РИИБдин КМКнын ыкчам кызматкерлеринин ыкчам иш-аракеттеринин натыйжасында кармалышкан.
Уурдалган малдарды ташып жүргөн “Mercedes-Benz Sprinter” үлгүсүндөгү эки автоунаа такталып, бирөөсү ИИОнун токтотуучу жайына киргизилген.
Учурда иликтөө иштери уланууда.
КОММЕНТАРИЙ КАЛТЫРУУ