Мурдагы союздун курамындагы мамлекеттердин 12 экс-президенттери Владимир Путин жетектеген учурдагы Орусиянын саясаты совет бийлигинин аракеттерин эске салат деген пикирде.
“Эркин Европа-Азаттык” үналгысынын “Орусия жана мен” аттуу жаңы долбоорунун алкагындагы маектер топтому 18-февралда жарыяланды. Анда мурдагы советтик мейкиндиктеги республикалардын жетекчилери Орусиянын саясаты тууралуу ойлорун ортого салышкан. Алардын маектерин “Азаттык” үналгысынын белорус кызматынын кабарчысы Анна Соусь жарым жыл бою чогулткан. Мурдагы президенттердин айрымдары Москванын кадамдарына кыжырдануусун, кээ бирлери колдой турганын билдиришкен. Бирок дээрлик баары азыркы Орусиянын саясаты көбүнесе Советтер союзунун аракеттерин эске салууда деген пикирлери менен бөлүштү.
Украинанын биринчи президенти Леонид Кравчук Орусия Киевди өзүнө көз каранды болууга тийиш деп ойлой турганын, аны өз алдынча өлкө катары эсептебей турганын айтты. Ал союз ыдырагандан кийин Украинаны колдон чыгарбоо үчүн Москва бийлиги тарабынан басым болуп турганын, иш жүзүндө эгемендик алган мамлекеттер эркин болбой эле, Орусиянын айтканын айткандай аткарып турганын эскерди.
Экс-президенттердин көпчүлүгү Путиндин бийликке келиши менен Михаил Горбачевдун аракетинин натыйжасында Орусия эркин жана демократиялык мамлекетке айланат деген үмүт үзүлгөнүн да белгилешти.
Орусия тууралуу ойлорун Аскар Акаев, Витаутас Ландсбергис, Нино Бурджанадзе, Роберт Кочарян, Петром Лучинский, Станислав Шушкевич, Виктор Ющенко жана башка мурдагы жетекчилер билдиришкен.
(Долбоорду бул жерден көрүүгө болот: “Орусия жана мен. Кремлдин көлөкөсүндө” http://www.svoboda.mobi/a/27557211.html).
КОММЕНТАРИЙ КАЛТЫРУУ