Бүгүнтөн баштап Москвада түзүлгөн “Кеменгер” уюмунун ыктыярчы кыргыз балдары жумуштан кеч чыккан кыргыз кыздарын үйлөрүнө жеткирип турушат. Бул тууралуу айтылган идеянын демилгечиси Адилет Чилдебаев super.kg порталына бүгүн, 2-мартта билдирди. Маалыматка ылайык, бул уюмду түзүүгө кыргыз кыздарын кордогон “патриоттордун” жоруктары түрткү болгон. “Биздин уюм расмий түрдө катталып ачылган жок. Мүмкүнчүлүк болушунча жигиттерди ойготуп, кыз-келиндерди, эжелерибизди, карындаштарыбызды сактайлы деген максатта уюмду түздүк. “Жаңы муун” уюму менен чогуу бул ойду ишке ашыруу аракетин көрүп жатабыз. Буюрса, бүгүнтөн баштап жигиттерибиз бизге кабар бергендерди тосуп алып, үйлөрүнө жеткирип турушат”,- дейт Чилдебаев. Ал эми уюмга келген ыктыярчылар тууралуу төмөнкүлөргө токтолду: “Адамзаттын акыл эси жаратылышынан негативдүү ойлорго жакын, ишенимдүү эмес, бирок мен чын дилимен ыктыярчылар жакшы ойлордон тайбагандар деп ишенем. Алардын да энелери, карындаштары, эжелери, аялдары, дос кыздары бар”.
Булак: formula.kg
КОММЕНТАРИЙ КАЛТЫРУУ