Жогорку Кеӊеште премьер-министрдин өкмөттүн түзүмүн өзгөртүү жөнүндөгү сунушу каралууда. Жыйынга башбакан Сооронбай Жээнбеков баштаган өкмөт мүчөлөрү, мамлекеттик органдар менен мекемелердин жетекчилери катышып жатат.
Сооронбай Жээнбеков дүйнөдө жүрүп жаткан өзгөрүүлөргө байланыштуу, Кыргызстандын ЕАЭБ курамына кошулуу шартында, аткаруу бийлигинин ишин оптималдаштыруу, анын натыйжалуулугун арттыруу максатында, 2016-жылдын 13-апрелинде Жогорку Кеӊеш тарабынан бекитилген «КР Өкмөтүнүн түзүмү жөнүндө» токтомго өзгөртүү киргизүү сунушу менен кайрылып жатканын билдирди. Ошондон улам, төмөнкүдөй түзөтүү киргизүү сунушталууда:
– Геология жана минералдык ресурстар боюнча мамлекеттик агенттиктин базасында Өнөр жак, энергетика жана жер казынасы мамлекеттик комитетин түзүү;
– Айыл чарба жана мелиорация министрлигинин иш-милдетин кеӊейтүү менен, – Айыл чарба, мелиорация жана тамак-аш өнөр жайы министрлигин түзүү;
– Мамлекеттик байланыш агенттиги менен Өкмөттүн Электрондук башкаруу борборунун базасында Маалыматтык технологиялар жана байланыш мамлекеттик комитетин түзүү;
– Экономика министрлигин, Транспорт жана коммуникациялар министрлигин, Геология жана минералдык ресурстар боюнча мамлекеттик агенттикти кайра түзүү жана иш-милдеттерин кыскартуу, Транспорт жана жол министрлигин түзүү;
– жер казынасына көзөмөл боюнча иш-милдетти кошуу менен, Экологиялык жана техникалык коопсуздук боюнча мамлекеттик инспекциянын иш-милдеттерин кеӊейтүү.
Ошентип, Өкмөт курамында 12 министрлик, 4 комитет, 7 агенттик, 11 кызмат, 2 инспекция, 3 фонд (Соцфонддон тышкары), 1 холдинг, мындайча ай тканда, баардыгы 40 мамлекеттик орган болот.
Андан сырткары, премьер-министр аткаруу бийлик бутагынын түзүмүнө сунушталып жаткан өзгөртүүлөр чечимдердин ыкчам кабыл алышына, иш натыйжалуулугун кайла арттырууга түрткү берерин белгиледи. Ал мындай чаралар штат бирдигинин көбөйүшүнө жана мамлекеттик бюджетке кошумча чыгымдарды алып келбей турганын билдирди.
Жогорку Кеӊеште премьер-министрдин өкмөтүнүн түзүмүн өзгөртүү жөнүндөгү сунушун талкуулоо жолжоболору улантылууда.
КОММЕНТАРИЙ КАЛТЫРУУ