Жогорку Кеңештин акыркы жыйыны чыр менен бүткөнү калды

Жогорку Кеңеш бүгүн, 30-июлда акыркы жыйынын өткөрүп жатат. Ошону менен депутаттар күзгө чейин эс алууга тарашат. Акыркы шансын пайдаланып калгысы келген эл өкүлдөрү микрафон талашып, бирин-бири уккусу келбей, тил кайрашуулар күчөдү. Эптеп эки нерсенин башын кошуп, мыйзам токугандар мыйзамын өткөрүп алууга жан үрөшсө, кээлери кемчилигин моюнга алып, жазган мыйзамын артка кайтарып алышууда. Төрдө отурган төраганын айласы куруп, жыйынды башкара албай убара чегип жатат. Арасынан чыккан акылдуулары урушуп-талашпай жөн эле кетели, эки айда кайра эле сагынышып калабыз, ыр менен башталган ЖК жыйынын чыр менен бүтүрбөйлү дешип кесиптештерин тыюу аракетин көрүп жатышат. Кыскасы, бүгүнкү жыйын маанилүү маселелер менен эмес, чыр-чатактар менен аяктай турган болуп калды.