АКШ мамкатчысынын орун басары Сара Сьюэлл “Казакстандагы жер сатууга каршы өткөн митингдер Вашингтон тарабынан уюштурулду” деген айрым пикирлерди четке какты.
Мындай версияны ал “өтө күлкүлүү” деп сыпаттады. АКШ Мамлекеттик катчысынын жарандык коопсуздук, демократия жана адам укуктары маселелери боюнча орун басары Сара Сьюэлл төрт күндүк иш сапары менен Казакстанга келген.
– Демократиянын бир белгиси– бул сөз эркиндиги жана адам укугунун сакталышы. Өз пикирин өкмөткө жеткире билүүгө мүмкүнчүлүк алуу. Тилекке каршы аткаруу бийлиги өз оюн эркин билдирүү үчүн жарандарга шарт түзүп бербей жатат. Айрым учурда эл кээ бир адамдардын, уюмдардын жана жетекчилердин сөздөрүн коомдук пикир катары кабылдап жатат. Бул туура эмес, -деди Сара Сьюэлл.
АКШ мамкатчысынын орун басары сапар алкагында бийлик өкүлдөрү менен былтыр кабыл алынган өкмөттүк эмес уюмдар жана салык кодекси тууралуу мыйзамдарга кирген өзгөртүүлөрдү талкуулады.
Расмий Астананын өкүлдөрү жаңы документтер бейөкмөт уюмдардын ишмердүүлүгүнө тоскоол жаратуу үчүн кабыл алынган жок деп ишендиришти. Мындан тышкары Сара Сьюэлл Астанада терроризм жана экстремизм маселелерин иликтеген уюмдар менен пикир алышты.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ