Мародерчулук, Конституцияны жаман ниети үчүн жазгандар, банктагы ячейкаларды тоногондор эртеби-кечпи сөзсүз жооп берет. Эгемендүүлүк күнү президент бир топ жылдан бери эл арасында айтылып келген сөздөр тууралуу ачык айтты. А.Атамбаевдин мындай ачуу чындыкты айтарын эч ким күтпөсө керек. Бирок, өлкө башчысы ачуу чындыкты бетке айтты.
Уурулар, мародерлор, кылмышкерлер камалышы керекпи? Эми коомчулукту дал ушул суроо кызыктырып баштады. 2010-жылга чейин президенттен тамекиге акча сурап жүрүп бүгүн “Жип” тээп жүргөндөр, банктагы элдин акчасын уурдагандар, кыска аралыкта хансарай салгандар татыктуу жазасын алабы?
Роза Отунбаеванын учурунда жасалган кылмыштар эч качан көз жаздымда калбашы керек жана мындай жолго баргандар катаал жазага тартылууга тийиш. Эгер “өткөөл мезгилдин” президенти коррупциялык кылмыштардын мөөнөтү эскирбей турганын билбесе кулак кагыш кылып коёлу. Азыр 20 жыл мурда уурдасаң да соттоло турган заман. 7-апрелге чейин чычкак улагы жок байкуштар бүгүн кымбат унаа айдап, Венеция комиссиясына кайрылып бекер жерден “тың” болуп жатпаса керек. Мындай адамдардын артында сөзсүз калбыры болот.
Буга эл кандай карайт? Эл деле мамлекетти тоногондордун, кан менен бийликке келип, уурулук менен байыгандардын жазаланышын күтүп турат. Отунбаева деле 2010-жылдан кийин кымбат кийим-кечелерди, бриллиант сөйкөлөрдү тагып, жыргап жашап жатканын билебиз. Лондондун чок ортосунан кыймылсыз мүлк сатып алганы деле белгилүү. Мындай байлыкты кайдан тапты? Же пенсиясына ушинтип жашаганга болобу? Албетте, жок.
Уулу Атай Садыбакасов экинчи дүкөнүн ачылып, акчаны сапырып жаткан чагы. Кечээки студент, социалдык тармактарды өзүн пиарлагандан башканы билбеген “боз бала” мындай ийгиликке кантип жетти? Апрель окуясынан кийин Убактылуу Өкмөттүн айрым мүчөлөрүнүн жакындары кыска аралыкта миллионер болуп чыга келди. Бул акчаларды кайдан алышты? Банктардагы ячейкалардан. 2010-жылга чейин Отунбаева кандай жашады эле? Аны жакындан билгендер карызга акча сурап жүргөнүн айтып эле жүрөт.
Эгер бүгүн Отунбаеваны колдоп митинг өтө турган болсо аны мародерлор тойго айлантып жиберип, өздөрүн актоо үчүн колдон келгенин жасайт. Аянтка бейөкмөт уюмдарынын өкүлдөрү, жумуш издеп көчөдө тургандар чыгат. Муну жалпы эл деп атоого ооз деле барбайт. Мекен үчүн күйгөн, мамлекеттин эртеңин ойлогон адамдар мындайга эч качан барбайт. Бирок, “бешинчи колонна” атыккан топ ар кандай арам иштерге барыштан деле кайра тартпайт. Бирок, элибиз баш-аламандыкка эч качан жол бербейт.
Булак: “Эгемен” гезити
КОММЕНТАРИЙ КАЛТЫРУУ