Эки күн элдин маанайын бузгум келген жок. “Жакшыны жакшы” деш адамдык парз. Президент дагы жетине алган жок, карапайым калк абдан кубанды. Бирок, бир жагдайды айтуу дагы парз. Эл ары кетсе ары көздөй “ура” деп, бери кетсе бери көздөй “ура” деген айрым замандаштарым, аты-жөнүңөрдү тактап эле коёт элем, күздүн күнү “жылаңач” калган кыйыныраак өзү. “Менин президентим”, “Айым” жана “Күнүм” деген жолдоштор, албетте, менин Силер менен пикирим келишпейт, себебин тактап койбосо орой жазганда “жасакер аял жаткыча таяк жейт” дегендей эле болуп кеттиңер…
Дүйнөлүк көчмөндөр оюну менин төркүнүмдө өттү, анда атылган салют үйүмдүн чатырына чачырап жатат, оюндан калган таштанды деле Кудай буюрса, короомо чейин кирет. Жалпы журт шилекейин агызган 1000 комузчунун катарында бир тууган сиңдим, айылымдын балдары бар, ошол жакшы иш-чараны өткөрүүгө төркүндөрүм түп көтөрүлө чуркап жүрөт. Демек, “өпкөмдү ала чуркаганга” эн сонун себеп. Бирок, өтө кубана албай турам, анткени, үйүмдөн алыс болгону менен Үнкүр-Тоо кыргыздын жери, өзбек чек арачылары кармап кеткен жарандар менин замандаштарым, элдин баары Дүйнөлүк көчмөндөр оюнунда жүргөндө Аксыдагы сел алуудан улам үйсүз калган бир топ үй-бүлө күн сууктаганына карабай чатырда жашап жатат.
Өзбек президентинин өлүмүнөн кийин кыргыз-өзбек мамилеси кандай болот деген санаркоо жок эмес. Күйүп кеткен кыз-келиндердин күйүтү басыла элек. Баарын бирден тербейин, кыскасы, маселе көп. Ушундай абалда “Айым”, “Күнүм” дегенди азыраак жазсаңар жарашат эле. Ооба, мен жаманмын, болгондо дагы жаман журналистмин, эл жакшы жагын көрсө, мен жаман жагын көрүп турбасам “башым ооруйт”. Бирок, позициям так, Алмазбек Шаршеновичтин дагы, ага чейинкилеринин дагы этегине илээшкен эмесмин, эми деле ошондой. Анткени, курган курсак үчүн позицияны сатып, “күнкарама”, жеркарама” болуп жүргөнчө өлгөн артык. Ал эми фейсбук, согуштук талаага айланат деп корккондор, фейсбук жокто деле айтылчу пикирлер айтылып келген, экрандын артындагы эрөөл эч нерсе эмес. Эң негизгиси жүздү жоготпош керек…
Канышай Мамыркулова, журналист
КОММЕНТАРИЙ КАЛТЫРУУ