“Ислам мамлекети” экстремисттик тобунун басма сөз катчысы Абу Мохаммед аль-Аднани Американын аба соккусунан кийин тындым болду. Бул маалыматты Пентогон дагы тастыктады.
Пентогондун маалымат катчысы Питер Куктун айтымында, Сириянын Эль-Баба аймагына жакын жердеги соккудан ИМ тобунун башкы насаатчысы, үгүтчүсү жана чет өлкөдөгү террордук операциялардын архитектору жок кылынды. Аданинин өлүмү топтун ишмердүүлүгүн биртоп кыйындатат. Себеби ал ар кыл өлкөлөрдө жарандык объектилерге жалгыздап кол салууларды жасоого шыкак берчү.
Авиасокку 30-августта Predator учкучсуз аппаратынын жардамы менен жүзөгө ашкан. Hellfire ракетасы Аднани түшкөн автоунааны жок кылган.
Аднани ИМ тобунун маалымат катчысы катары кызмат өтөп, Париж, Брюссель, Стамбул андан тышкары Бангладештеги ири чабуулдарда маанилүү ролду ойногон. Расмий адамдардын билдирүүсүнө ылайык, ал Синай жарым аралында орусиялык авиалайнерге болгон кол салууга да катышкан.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ