“Референдумга жол жок” кыймылы Конституцияны өзгөртүүгө каршы кол топтоодо. Алар ошондой эле парламентти таркатуу чакырыгы менен чыгышууда. Активисттер бийлик жарандардын пикирлерин укпай жатат деп айыпташууда.
Кыймылдын төрайымы, Эсеп палатасынын мурдагы башчысы Элмира Ибраимованын айтымында, учурдагы Жогорку Кеңеш мыйзамдарды бузуу менен элдин пикирин эске албастан Баш мыйзамга өзгөртүү киргизүүгө аракет кылууда. “Баш мыйзамга өзгөртүү киргизүү мыйзам долбоору адам укугу, гендердик жана антикоррупциялык экспертизалардан өткөрүлгөн жок. Бул мыйзам долбоорду тезинен кабыл алууну жактагандар жогорку жактан бекитилген график боюнча ишти жүргүзүү керектигин ачык эле айтып жатышты. Жогорку Кеңештин мыйзамдарды бузган, регламентти бузган, элдин пикири менен эсептешпеген иш-аракети анын легитимдүүлүгүнө доо кетирди. Бул мыйзамсыз жараянга тиешеси бар парламенттин легитимдүүлүгү боюнча да маселе жаралды”-деди ал.
Кыймылдын мүчөлөрү кол топтоо 40 күн болорун жана алгачкы жыйынтыгы 8-октябрга белгиленген курултайда жарыяланарын айтышты. Алар мындай жол менен бийликти Баш мыйзамды өзгөртүү демилгесинен баш тарттыруу максатын көздөйт. Кол топтоону эл аралап жүргүзүү пландалууда.
Оппозициянын референдумду өткөрүүгө каршылыгына карабай, бийлик Баш мыйзамды өзгөртүү аракетин улантууда.Дүйшөмбүдө референдумду 4-декабрда өткөрүүнү караган мыйзам долбоор Жогорку Кеңешке келип түштү. Анда өкмөт менен Борбордук шайлоо комиссиясына референдум өткөрүүгө даярдык көрүү тапшырмасын берүү каралган.
Айрым маалыматтар боюнча референдумду жергиликтүү кеңешке шайлоолор менен чогуу өткөрүү пландалууда. Бирок БШК жергиликтүү кеңешке шайлоолор качан өтөрүн ачыкка чыгара элек.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ