Ташкент шаарынын акими Рахмонбек Усманов ажырашуу көйгөйлөрүнө арналган чогулушта, бул жараяндын көбөйүшүнө президенттин милдетин аткаруучу, премьер министр Шавкат Мирзиёев кабатыр болуп жатканын билдирди. Бул туурасында жергиликтүү ММКлар маалымдашты.
Чогулуш маалында белгилүү болгондой, статистика боюнча үй-бүлө бузулган соң, беш аялдын бирөө гана кайра турмушка чыгат. “Ал эми башкалардын тагдыры эмне болот? Эгер биз бул көйгөйдү чечүү жолдорун эрте таппасак, ажырашкандарын саны мындан дагы артат”, – деди Ташкент акими.
Жолугушуу соңунда шаар башчысы ажырашкандардын ысымдарын “Ташкент” телеканалында жана “Кечки Ташкент” гезитинде жарыялоо боюнча токтом даярдалып жатканын билдирди.
Акимдин пикиринде, мындай маалыматтарды коомчулукка жайылтуу оң таасирин берип, ажырашуулардын саны кыскарат. “Ажырашкан түгөйлөрдүн ысымдары жарым ай сайын кечки саат 23:00дө эфир аркылуу айтылып турат. Эгер жакшы жыйынтык болбосо, биз анда үй-бүлө мүчөлөрүнүн сүрөттөрүн да көрсөтүп баштайбыз. Муну менен биз кимдир бирөнүн укугун бузбайбыз, тескерисинче коомчулукка так маалымат беребиз”, – деди Рахмонбек Усманов.
Аким ыйкы-тыйкыга себеп болгон үй-бүлө мүчөлөрү – кайнене, кайнаталар, андан тышкары келиндер телешоудогу коомдук талкууга катышарын кошумчалады.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ