Ажырашуулардын көбөйүп, жашоо деңгээлинин төмөндөп жаткандыгына арызданган аялдарга жооп иретинде тажик депутаттары милдеттүү түрдө нике келишимин түзүүнү сунуштоодо.
Тажикстандын үй-бүлө мыйзамдарына өзгөртүү киргизүү демилгеси парламентке былтыр ноябрь айында киргизилген. Ажырашуу маалында мал-мүлктү, ал гана эмес балдарды бөлүштүрүү тажрыйбасы Батышта кеңири тараган. Бирок тажик коомчулугу буга даяр эмес дегендер болгону менен мыйзам долбоорунун колдоо табары күтүлүп жатат.
Мыйзам долбоорун Аялдар боюнча мамлекеттик комитет демилгелеген. Документ ажырашуудан кийин аялдардын каржылык абалына кам көрүүгө багытталган. Бийлик эркектердин укуктары дагы корголорун баса белгилөөдө.
Статистика боюнча мамлекеттик комитетттин маалыматына караганда, 2016-жылы 9 миңдей ажырашуу катталган. Бул 2015-жылга салыштырмалуу 4,4 % көп дегенди билдирет.
Тажикстанда жаш үй-бүлөлөр күйөө тараптын ата-энелери менен жашашат. Жеке турак-жайлары болсо дагы ал эркектердин наамына катталган. Ажырашуу маалында сот күйөөлөрдү алимент төлөөгө милдеттендирген менен чечим аткарыларына толук кепилдик жок. Көптөгөн тажиктер Орусияда мыйзамсыз иштеп жүргөндүктөн, алардын чыныгы кирешелерин аныктоо дагы өтө оор.
Булак: “Борбор Азия жаңылыктар кызматы“
КОММЕНТАРИЙ КАЛТЫРУУ