23-февралга белгиленген Дүйшөмбү-Ташкент аба каттамы белгисиз себептерден улам кайрадан ишке ашкан жок. Тажикстандын “Сомон Эйр” компаниясынын учагы алгач ирет керектүү документтер өзбек тарапка убагында тапшырылбагандыктан учкан эмес.
“Сомон Эйр” авиакомпаниясынын учагы 23-февраль күнү түштө Дүйшөмбүдөн Ташкентке сапар алмак. Билеттер сатылганы кабарланган. Бирок белгисиз себептерден улам тажик лайнери өзбек борборуна уча албай калды. Бул тууралуу Дүйшөмбүнүн эл аралык аэропортунан кабарлашты.
“Сомон Эйр” тажик авиакомпаниясынын Дүйшөмбү-Ташкент аба каттамы боюнча алгачкы ырааттуу учуусу 20-февралда да үзгүлтүккө учураган. Тажик компаниясы анда күнөөнү өзбек тарапка оодарган.
Бирок кийинки күнү Дүйшөмбү-Ташкент аба каттамы үзгүлтүккө учураганына байланыштуу Тажикстандын “Сомон Эйр” компаниясынын жетекчилери кызматтан бошотулган. Алар убагында Ташкент аба майданын тийиштүү документтер менен камсыздашкан эмес.
Эки өлкө ортосундагы аба байланышы 1992-жылы Тажикстанда жарандык согуш башталганда токтогон.
Булак: Борбор Азия жаңылыктар кызматы
КОММЕНТАРИЙ КАЛТЫРУУ