Жалпысынан көргөзмөгө Грузия, Орусия, Ооганстан, Украина жана Тажикстан өлкөлөрүнөн барган 15 сүрөтчүнүн 100 эмгеги коюлду. Экспозиция 26-апрелде ачылып, Дүйшөмбү шаарынын туулган күнүнө арналды.
Көргөзмөдө Тажикстанда башкалка алган ооган качкындарынын тарткан сүрөттөрү коомдун өзгөчө кызыгуусун жаратты. Анда үч эмгеги коюлган 23 жаштагы сүрөтчү Отифа Одилпур Ооганстандан качып келип, Тажикстанда качкын макамын бир жарым жыл мурда алганын билдирди.
«Мен коркуу сезиминен күчтүүмүн» аттуу сүрөт Отифа Одилпурдун эмгектеринин бири. Айтымында, ал бул сүрөт аркылуу ар бир аял өз укугу үчүн күрөшүп жана аны коргой ала тургандыгын көрсөткүсү келген.
Дагы бир ооган сүрөтчүсү Бону Одилпур көргөзмөдө чүмбөттөлгөн аялдын жарым-жартылай ачылган жүзү көрүнүп тургандыгы тартылган эмгегин койгон. «Ооганстанда аял жабык жашоо образын баштан кечирет: чүмбөттөнүп, жүзүн башкаларга көрсөтүү укугуна ээ эмес. Бул сүрөт ар бир аял өз тагдырын өзү тандап алууга укуктуу экенин көрсөтүп турат», — деди ал.
Көргөзмөгө барган АКШнын Тажикстандагы элчиси Элизабет Миллард дагы ооган сүрөтчүлөрүнүн эмгектери абдан жакшы таасир калтырганын айтты. Ал «Мен коркуу сезиминен күчтүүмүн» деген сүрөт жаш кыздар менен балдарды кайдыгер калтырбайт жана алардын жашоосунда маанилүү ролду ойношу мүмкүн деген ишенимин билдирди.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ