12-май күнү Каракол ШИИБнүн Кашка-Суу шаардык милиция бөлүмчөсүнүн башчысына 2016-жылдын ноябрь айында В. аттуу адам тааныштарынын үйүнөн белгисиз адамды өлтүрүп, ошол эле үйдүн огородунда көмүп салганы туралуу ыкчам маалымат түшкөн. Бул туурасында ИИМдин басма сөз кызматы маалымдады.
Аталган ыкчам маалымат боюнча жүргүзүлгөн ыкчам-иликтөө иштеринин натыйжасында Ысык-Көл ОИИБнын жана Каракол ШИИБнүн тергөө-ыкчам тобунун кызматкерлери тарабынан болжолу кылмыш болгон Жантөшев көчөсүндө жайгашкан үйдү аныкташат. Калыс адамдардын катышуусунда кароо жүргүзүү мезгилинде, аныкталган үйдүн огородунун түндүк-чыгыш тарабынан жерге көмүлгөн европа улутундагы белгисиз адамдын жансыз денеси табылып алынат. Белгисиз адамдын эмне себептен каза болгондугун аныктоо максатында соттук-медициналык экспертиза дайындалат.
Белгисиз адамдын өлүгү табылган жердеги үйдүн ээси, 40 жаштагы К.Натальянын көрсөтмөсү боюнча, өткөн жылдын ноябрь айында анын күйөөсү, таанышы Вася жана белгисиз адам болушуп, үйүндө спирт ичимдиктерин ичип жатышкан. Бардыгы белгисиз адамга Вертолет деп кайрылышып жатышкан. Спирт ичимдиктерин ичип жатышканда Вася менен белгисиз адамдын ортосунда уламдан-улам чыр-чатак чыгып жаткандыгын айтып, андан кийин кызып калгандыктан үйдүн ээси өз бөлмөсүнө уктаганы кетип калгандыгын, ойгонгондо үйдүн ичинде таанышы Вася жана күйөөсү гана бар экендигин, ал эми Вертолет аттуу белгисиз адам кетип калгандыгын билдирген. Ошондой эле, үйдүн ээси күйөөсү ушул жылдын январь айында каза болгондугун дагы кошумчалаган.
Жүргүзүлгөн ыкчам-иликтөө иштеринин натыйжасында Ысык-Көл ОИИБнын жана Каракол ШИИБнүн кылмыш иликтөө кызматынын ыкчам кызматкерлери тарабынан Вася аттуу адамдын өздүгү аныкталып, ал мурда уурулук үчүн соттолгон 46 жаштагы Б. Василий болуп чыкты. Сурака алынган учурда ал күнөөсүн толугу менен мойнуна алып, 6 ай мурун тааныштарынын үйүнөн Вертолет аттуу адамды сабап өлтүрүп, андан кийин жерге көмүп салгандыгын жактоочунун катышуусунда айтып берди.
Аталган факты боюнча Каракол ШИИБнүн тергөө бөлүмчөсү тарабынан КР КЖКнын 97-беренеси (Адам өлтүрүү) беренеси менен кылмыш иш козголуп, кылмыштын жагдайларын жана өлгөн белгисиз адамдын өздүгүн аныктоо боюнча тергөө амалдары жүрүп жатат. Кылмышка шектүү катары кармалган Б. Василий шаардык милициянын убактылуу кармоочу жайына киргизилди.
КОММЕНТАРИЙ КАЛТЫРУУ