3-майда курдаштары тарабынан сабалып, 1-июнда каза болгон Ташкенттеги медициналык колледждин 18 жаштагы студенти Жасур Ибрагимовдун мугалимдери жетекчилик тарабынан кысым көрсөтүүлөр болуп жатканына даттанышты. Айтымдарында, алар дем алышсыз жана эмгек өргүүсүз иштөөгө мажбурланып жатышат.
Мугалимдердин атынан «Азаттыктын» өзбек кызматынын редакциясына жөнөтүлгөн катта айтылгандай, 11-июнда дем алыш күн экенине карабастан Ташкент медициналык колледжинин кызматкерлерин жумушка чыгууга мажбурлашып, аларга мындан ары эс алуусуз жана эмгек өргүүсүз иштей тургандыктарын билдиришкен.
– Мурдагы директор иштен алынды, жаңысы дайындала элек. Колледжде дагы деле текшерүү иштери жүрүп атат. Чогулуштарда Жасурдун өлүмүнө дайыма бизди, мугалимдерди күнөөлөп, анын каза болушуна биздин көңүл коштугубуз себеп болгонун айтып келатышат. Текшерүүлөрдөн чыдамыбыз түгөнүп баратат, – деп жазылган катта.
Анткен менен окуу жайдын жетекчилиги мугалимдерге сөзсүз эс алуу күндөрү жана эмгек өргүүсү бериле турганын билдирүүдө. “Анан да аларды эч ким айыптап, басым жасаган жок. Прокуратура бардыгын текшерип жатат, күнөөлүүлөрдү сот аныктайт, – деп билдиришти окуу жайдын жетекчилигинен.
Буга чейин бул иш боюнча бир нече киши кармалган. 4-июнда Ташкенттин жүздөгөн тургуну бийликтен күнөөлүүлөрдү жазалоону талап кылып көчөгө чыгышкан.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ