Акыркы жылы Тажикстан менен Өзбекстандын ортосундагы товар алмашуу 5,7 эсеге өсүп, 69,2 млн. долларды түздү. Бул тууралуу 20-июнда Дүйшөмбүдө өткөн эки өлкөнүн өкмөт мүчөлөрү жана ишкерлери катышкан биргелешкен жыйында айтылды.
Тажикстан өкмөтүнүн вице-премьери Давлатали Саид товар алмашуу көрсөткүчүнүн жогорулашына жогорку деңгээлдеги сүйлөшүүлөр, эки өлкөнүн ишкерлеринин бизнес-форумун жана көргөзмөлөрдү уюштуруу себеп болгонун билдирди. Өз кезегинде Өзбекстандын вице-премьери Улугбек Розикулов тажик кесиптешинин айткандарын ырастап, өзбек ишканаларынын коңшу өлкөдөгү акыркы жыйырма беш жыл ичиндеги эң ири көргөзмө-жарманкесинде 50 миллион доллардан ашык суммадагы келишимдерге кол коюлганын айтты.
Сентябрда болсо Ташкентте Тажикстандын маданият күндөрүн жана тажик товарларынын көргөзмө-жарманкесин өткөрүү пландалууда.
Анткен менен жыйынга катышкан ишкерлердин көбү эки өлкө ортосундагы кызматташтыкты өнүктүрүүдөгү эң чоң тоскоолдук катары визалык режимди эсептешет.
Айыл чарба азыктарын кайра иштетүү менен алектенген компанияга ээлик кылган өзбек ишкери Хуршед Лутфуллоев Тажикстан менен Өзбекстандын ортосундагы виза режимин жоюу же жөнөкөйлөтүү боюнча өкмөткө өз сунуштарын жөнөткөнүн билдирди.
Тажикстандагы «Аваз Инженеринг» компаниясынын башкы директору Азим Хакимов дагы өлкөлөр ортосундагы виза режиминин жоюлушун колдойт. Айтымында, алгач ишкерлердин аэропорттордо жана чек ара бекеттеринде виза алуусунун жол-жоболорун жөнөкөйлөтүү керек.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ