Украинанын чек арачылары Молдованын өзүн Приднестровья республикасы деп атап алган аймагына украин паспорту менен кирүүгө аракет кылган орусиялык аскер кызматкери кармалганын билдирди. Бул тууралуу Фейсбукка Украинанын Мамлекеттик чек ара кызматынын расмий өкүлү Олег Слободян жазды.
Маалыматка караганда, окуя июндун башында эле болгон. Кармалган адам Валерий Войтенко деген ысымга жазылган жалпы жарандык паспортту көрсөтүп, ооруп жаткан апасына баратканын айткан. Бирок чек арачылар шек санап, аны текшерүүгө алышкан.
Текшерүү маалында анын жашыруун чөнтөгү бар экени аныкталган. Анда Преднестровьянын кызматтагы адамдары жана андагы орусиялыктар тууралуу маалыматтар, алардын телефон номурлары жазылган кагаз, «Кызыл жылдыз» ордени, смартфон жана флеш-карталар табылган. Алардын ичинде Донецктеги жикчилдердин кармалган талаа командирлери Михаил Толстых менен Арсен Павловдун Донбасста тартылган сүрөттөрү, ошондой эле чалгындоо иш-чараларын өткөрүү боюнча материалдар болгон.
Украин бийлигинин версиясы боюнча, 52 жаштагы кармалган адам – полковник Валерий Гратов. Ал Украианын коопсуздук кызматына өткөрүлүп берилди. Азырынча Гратовдун кармалгандыгы боюнча Орусия тарап эч нерсе билдире элек.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ