Түркмөнстан банктары улуттук валютаны конвертациялоого чектөө киргизди

“Азаттыктын” түркмөн кызматынын кабарлашынча, кезектеги чектөө өлкө президентинин сынанан кийин кабыл алынды. 7-июлда Гурбангулы Бердымухамедов банк тармагынын жетекчилигинин ишин сынга алып, каржы министрин отставкага кетирген. Мындан тышкары өкмөт “Президентбанк” менен”Халкбанкты” бириктирүү боюнча чечим чыгарган.

Ашхабаддагы булактардын кабарлашынча, учурда банктар манатты чет өлкөлүк валютага алмаштыруу кызматын көрсөтүшкөн жок. Банктар өз эсебиндеги акчаларды гана конвертациялай алышат.

Ашхабад банктарынын алдында манаттарын пластик карталарга салып, андан ары чет өлкөлүк валютага алмаштыруу үчүн кезекке тургандар көп.

Булак: “Борбор Азия жаңылыктар кызматы”