Тажикстандын Хатлон облусунун тогуз жашоочусу «Ислам мамлекети» тобунун идеаларын пропагандалагандыгы үчүн узак мөөнөттөргө кесилишти. Облустук соттон билдиришкендей, иликтөө иштеринин жүрүшүндө айыпталуучулардын ар биринин күнөөсү делилденген.
Маалыматка караганда, топтун башчысы Файзиддин Шомардонов 20 жылга эркинен ажыратылды. Топтун калган мүчөлөрү 12 жылдан 18 жылга чейинки мөөнөттөргө камалышты.
Соттолуучулар ИМдин идеаларын пропагандалоодон тышкары жаштарды ал террордук уюмдун катарына тартуу менен дагы алектенишкен. Тергөөнүн жүрүшүндө Файзиддин Шомардоновдун Сирия жана Ирактагы ИМ жоочулары менен дайыма байланышта болуп келгени аныкталган.
Соттолгондордун бири, 15 жылга эркинен ажыратылган Абубакр Сатторовдун гана туугандары Жогорку сотко даттанууга ниеттенип жатышат. Анын атасы Файзиддин Сатторов уулу жалган жалаанын негизинде камалды деп эсептейт. «Менин уулум дайыма мыйзам бузбаган жаран болгон. Курган-Төбөдөгү “Royal Baby” компаниясында иштечү. Азырынча соттун өкүмүн берише элек. Бирок мен өкүмдү даттанып өлкөнүн парламентине кат жаздым», – деди ал.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ