Наманган облусунун Туракурган районунда мугалимдерди маяналарынын бир бөлүгүн “Обод кишлок” программасын ишке ашыруу үчүн которууга мажбурлашууда. Бул долбоор айыл жергесинде жеткиликтүү турак-жайларды курууга багытталган.
Мугалимдердин биринин айтымында, мектеп директору мамлекеттик программанын алкагында турак-жайларды куруу үчүн бир күндүк айлык акыны которууну талап кылган. Мындай буйрук облус башчысынан келген.
Бир күндүк маянасын которуудан баш тарткандарды окуу саатын кыскартып, жумуштан алабыз деген коркутушканы айтылууда.
– Биз 800 миң сум (100 доллардын тегереги) айлык алабыз. Болор-болбос маянабыздан мектептин ремонту үчүн акча кармап калышат. Эми минтип айыл жергесинде үйлөрдү куруу үчүн каражат талап кылышууда. Жетекчиликке баш ийүүдөн башка аргабыз жок, – деп даттанды атын атагысы келбеген мугалимдердин бири.
Айрым агартуучулар айыл жерин жакшыртуу үчүн өз эрктери менен акча беришкенин айтышты.
Элдик билим берүү башкармалыгынын Туракурган райондук бөлүмүн чиновниги мажбурлоо жок экенин, акча чогултуу ыктыярдуу түрдө жүрүп жатканын билдирди.
Өзбекстан президенти Шавкат Мирзиёев 29-мартта “Обод кишлок” программасы жөнүндө жарлыкка кол койгон. Долбоордо айыл жерлеринин архитектуралык көрүнүшүн түп-тамырынан бери өзгөртүү, инженердик-коммуникациялык, жол-транспорттук, инфраструктуралык жана социалдык объектилерди куруу каралган.
Булак: «Борбор Азия жаңылыктар кызматы»
КОММЕНТАРИЙ КАЛТЫРУУ