Өзбекстан Мамлекеттик салык комитетинин мурдагы башчысы Батыр Парпиев.
Анжиян шаарынын ички иштер бөлүмүнүн башчысы, полковник Шухрат Парпиев 27-майда ээлеген кызматынан бошотулду. Ошол эле күнү Бухара облустук ИИБ башчысынын орун басары Анвар Парпиев да отставкага кетти.
Өзбекстан укук коргоо органдарынын кызматкерлери билдиргендей, Шухрат менен Анвар Парпиевдер – Мамлекеттик салык комитетинин мурдагы башчысы Батыр Парпиевдин жээндери. Ал жумуштан 11-майда бошотулган.
Батыр Парпиев Улуттук коопсуздук кызматын 22 жыл башкарып, быйыл Мирзиёевдин буйругу менен отставкага кеткен Рустам Иноятовдун кудасы болуп эсептелет.
Такталбаган маалыматтар боюнча генерал Парпиевдин жээндеринин ишмердүүлүктөрүн текшерүү башталды. Бирок өлкө ИИМи бул боюнча комментарий берүүдөн баш тартты.
Шухрат Парпиев Анжиян шаарынын ички иштер бөлүмүнүн башчылыгына 2017-жылы мартта, Анвар Парпиев Бухара облустук ИИБ башчысынын орун басарлыгына былтыр июнда дайындалган.
Каримовдун доорундагы таасирдүү генералдардын бири Батыр Парпиев Мамлекеттик салык комитетин 14 жыл катары менен башкарган. Быйыл 11-майда Шавкат Мирзиёев аны иштен алган.
Өз булактар маалымдагандай, бийлик Шухрат Парпиев жана анын жакындарынын мал-мүлктөрүн каттоого ала баштады.
Булак: «Борбор Азия жаңылыктар кызматы»
КОММЕНТАРИЙ КАЛТЫРУУ