АКШ мамлекеттик катчысы Майк Помпео президент Дональд Трамп БУУнун 73-сессиясынын алкагында Иран президенти Хасан Роухани менен жолугуу өткөрүүгө даяр экенин билдирди.
Бирок Тегеран бул жолугушуунун ыктымалдуулугу өтө төмөн деп эсептейт. Күн мурун Иран президенти Хасан Роухани Ахваздагы аскер парады учурундагы террордук чабуулга кыйыр түрдө АКШ күнөөлүү экенин билдирген. Ирандын түштүк-батышындагы кол салуу 22-сентябрда болгон, теракт учурунда 28 киши өлгөн.
Роуханинин пикиринде, Вашингтон колдогон Перс булуңундагы өлкө Ирандагы өкмөткө каршы азчылыктарга колдоо көрсөтүүдө. Ал БУУнун Башкы Ассамблеясынын сессиясына катышуу үчүн Нью-Йоркко учуп кетерде: “Америка башка өлкөлөргө карата өзүн бейбаш катары алып жүрүүдө… жана кара күчтүн негизинде аракеттенсе болот деп эсептейт”, деп билдирген.
Бул билдирүүдөн мурун АКШнын Иран боюнча атайын өкүлү Брайан Хук Гудзон институтунда сөз сүйлөп, Вашингтон Тегеран менен өзөктүк жана баллистикалык программаларды жөнгө салган жаңы келишимге кол коюуга белсенип жатканын айткан. Анын билдиришинче, жаңы документти кабыл алуудан мурун Тегеран Вашинготон койгон 12 талапты аткаруусу керек. Билдирүүдө жаңы келишим Конгресс тарабынан жактырылышы зарыл экени белгиленген.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ