Түркмөнстанда 2019-жылдын 1-январынан тарта калкка бекер берилип келген электр энергиясы, газ, суу жана туз үчүн акы алына баштайт. Бул тууралуу «Азаттык» радиосунун түркмөн кызматы жергиликтүү ЖМКларга шилтеме кылып билдирди.
Өлкөнүн президенти Гурбангулы Бердымухамедов «Калкты электр энергиясы, газ, ичүүчү суу жана ашкана тузу менен камсыздоону тартипке салуу жөнүндөгү» токтомго кол койду.
Документте 2019-жылдын 1-январынан тарта «Түркмөнстандын калкын электр энергиясы, газ, таза суу жана туз менен жеңилдетилген тартипте камсыздоо» жоюла тургандыгы жазылган.
Түркмөн президенти Гурбангулы Бердымухамедов Элдик кеңештин 25-сентябрдагы жыйынында сүйлөп жатып, «өткөөл мезгилде калкка газды, электр энергиясын, сууну жана тузду бекер пайдалануу, ошондой эле коммуналдык кызматтар үчүн минималдуу тарифтерди белгилөө өңдүү бир катар жеңилдиктер берилгенин» билдирген.
Түркмөнстандын биринчи президенти Сапармурат Ниязов элге электр энергиясын, газды жана сууну 1992-жылы бекер кылган. Алгач түркмөн өкмөтү бул жеңилдиктерди 10 жылга киризип, кийин 2030-жылга чейин узарткан.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ