Чоң чиновниксиңби же жөнөкөй эле дыйкансыңбы, туулган күн деген ар бир адам баласы үчүн жакшы күн. Анткени ошол күнү жарык дүйнөгө келген. Уулдуу же кыздуу болгонуна ата менен эне да кубанган күн. Тилекке каршы, айрыкча саясатта баррикаданын эки башка жээгинде жүргөн айрымдарыбыз адам өмүрүндөгү жагымдуу күн болгон ошол туулган күндөн да оюн жасап именинникке карата терс пикирлерин айткандар да жок эмес, арабызда. Бул деген ошондой аракетти жасаган адамдын пастыгы. Ошондой күндө жакшы күндө ар кандай «жугунду» сөздөрүн айткан пенделер деле бар экенин көрдүк. Мейли, андайлар өз башы менен болсун.
Туулган күн демекчи, саясатта өз орду бар экс-министр, экс-депутат Камчыбек Ташиев кечээ эр ортону 50 жашка толду. Азыр Камчыбек мырзанын каруусу сезилген, туягы жетилген бышып турган курагы. Саясатта да жетиштүү даярдыгы бар. Кырдаалды туя билүү менен чечим кабыл алууга жөндөмдүү. Бир орунда токтоп тура албайт. Элчилдиги, патриоттуулугу менен айырмалуу. Ак ниет, ариэттүүлүгү да бар. Баалуу касиети-мекенчилдиги. Саясат саясаты менен болсун, а мындай учурда аз болсо да жылуу сөздү арнап коюу адамдык парс болуш керек деп ойлойбуз. Ылайым балдарынын кашында, үй-бүлөөсүнүн башында аман-эсен болсун. Анткени, жамандыкты ар дайым амандык жеңет.
«Айгай-пресс»
КОММЕНТАРИЙ КАЛТЫРУУ