Жолдорду «жонуп» байлык топтогон Кубанычбек Жумалиев менен Роза Аманованын махабаты «ыс-сык» экенин баарыбыз билебиз да. Бул аздык кылганбы, айтор «Бир Бол» фракциясынын депутаты Жумалиев аялына болгон арзуусу ашып-ташып кеткен окшойт, аны маданият министри кылууга тымызын аракеттенип атыптыр. Ансыз да ушуларды көргөндө кыжырыбыз шакардай кайнап чыкчу эле, эми Аманованы министр кылып алсак жыргайт экенбиз.
Деги ушул эски «вирустардан» эмнени кутүүгө болот? Ошол эле Жумалиев кезинде премьер-министр болуп турганда Кыргызстанды жыргатты беле? Жо-ок. Жалгыз өзү жыргаганын эл жакшы билет. Мамлекеттик кызматта жүрүп кантип миллионер болууну Жумалиевден сурасаңар, жаңылбай саймедиреп, лекция да окуп берсе болот. Анын байлыктарына сан жетпестиги айтылып келет. Алсак, кытайлыктардыкы деген жарнагы бар «Гоин» соода түйүнү, эмеректен тарта эшик-терезеге дейре сатылган «Таатан» базары, Бишкектин Чүй көчөсүнүн чыгыш жагындагы гүл-жемиш өстүрүүчү жайлар (теплицалар), Горький көчөсү менен Туңгуч кичи районун көздөй бара жаткан жол жээгиндеги ЭВМ заводунун имараты, «Манас жаңырыгы» телерадиосу ж.б. Мунун баары Жумалиевдин жеке менчик байлыгы. Баса, жогоруда айткан ЭВМ заводунун имаратын бир топ жыл кайсы бир жогорку окуу жайга ижарага берип келсе, эми ал жерде көрөр көзү Роза айым «Санат» деген телеканал ачып алып иштетүүдө. Элдин байлыгына эки колду матырып коюп, ээн-эркин сайраңдаган Жумалиев деген эргул эми каякты кайсап ийсем деп жаланып-жуктанып калыптыр. Ушулардын байлыгы адал жол менен табылганын бир тескеп койсок ашыкча болбойт эле…
Нургазы Айтмырзаев
Булак: “Де-факто”
КОММЕНТАРИЙ КАЛТЫРУУ