Бүгүн, 23-декабрда, Ленин райондук сотунда экс-мэрлерге байланыштуу сот отуруму уланып, анда айыпталуучулар Албек Ибраимов менен Кубанычбек Кулматовго акыркы сөз берилип, өкүм чыкты. Кулматовго беш миллион сом айып пул салуу менен сот залынан бошотулуп, эркиндикке чыкты. Ал эми Ибраимов 15 жылга эркинен ажыратылды.
Буга чейин прокурор Кулматовду 15 жылга, Ибраимовду 20 жылга кесүүнү сураган.
Эске сала кетсек, Кубанычбек Кулматов «Бишкектеги Калыс-Ордо конушундагы мектепти курууга бөлүнгөн 2 миллион долларды максатсыз пайдаланып, жемкорлукка барган» деп айыпталып, камакка алынган. Ал эми Албек Ибраимов «Ысык-Көлдөгү «Күнөстүү жээк» пансионатын сатууда мамлекетке 152 миллион сомдук зыян келтирген, «Дастан» ишканасын жетектеп турганда 270 миң доллар өлчөмүндө мыйзамсыз сый акы алган жана Бишкектин түштүгүндөгү беш гектар жерди мыйзамсыз бөлүп берүүгө тиешеси бар» деген айып менен камалган. Бирок, экөө тең мындай айыпты четке кагып, күнөөлүү эместигин айтып келген.
Булак: KyrgyzToday.kg
КОММЕНТАРИЙ КАЛТЫРУУ