Бүгүн, 1-августта Токио шаарындагы Макухари Мессе Борборунда олимпиада оюндарында грек-рим жана кыз-келиндердин күрөшү боюнча мелдештер курч мүнөздө башталып, килемде кыргыз балбандары Айпери Медет кызы менен Жоламан Шаршенбеков өлкө намысын талашты.Бул бетешүүлөр тууралуу Токиодон олимпиадалык команданын басма сөз катчысы, спорттук ба.яндамачы Кабыл Макешов билдирди.
Алгач “А” килеминде грек-рим күрөшүнөн 60 килограмм салмак боюнча Токио Олимпиадасына катышып жаткан кыргызстандык Жоламан Шаршенбеков алгачкы атаандашы, казакстандык Мейрамбек Айнагуловду эки мүнөттө мөөнөтүнөн мурда 8:0 эсеби менен ишенимдүү жеңди. 27 жаштагы Айнагулов деле оңой атаандаш эмес эле. Ал Дүйнө чемпионаттарынын күмүш (2017) жана коло (2019) медаль байге ээси болгон.
22 жаштагы Жоламан Шаршенбеков 2020-жылы Дүйнө кубогунда алтын, 2018-жылы дүйнө чемпионатында күмүш байге уткан.
Тилекке каршы Жоламан Шаршенбеков чейрек финалда атаандашы Европа чемпиону, молдовалык Виктор Чобануга 9:0 эсебинде утулуп калды. Мурда Дүйнө кубогунун таймашында Жоламан бул жигитти утуп алгандыктан, өзүнө ишенип, каталыктарды көп кетирип койгондугун мелдешти көрүп жаткан КР эркин күрөш федерациясынын президенти, генерал Мелис Турганбаев айтып, эми Виктор Чобану кубалык аттаандашын жарым финалда утуп, финалга чыкса Жоламан коло байге үчүн күрөшүүгө мүмкүнчүлүк алаарын кошумалады.
Ушул 1-август күнү Токио олимпиадасынын кыз-келиндер арасында эркин күрөш боюнча 76 кг салмакта күрөшүп жаткан Айпери Медет кызы алгачкы күрөшүндө атаандашы 2016-жылы Рио-де Жанейро Олимпиада оюндарынын коло байгеси, казакстандык балбан Элмира Сыздыкованы 6:1 эсеби менен далысын килемге таза тийгизип утуп, чейрек финалга чыкты. Кийинки айлампада орусиялык Олимпиада чемпиону Наталья Воробьева менен күрөшүп, Айпери аны дагы 12:0 эсеби менен утуп, жарым финалга чыкты.
Кыргызстандык күйөрмандардын үмүтүн жандырган 22 жаштагы Айпери Медет кызы жаштар арасындагы дүйнө чемпиону жана эки коло байгенин ээси болуп саналат. Ошону менен бирге 2020-жылы Азия чемпиону аталып, Дүйнө кубогунда 3-орунду ээлеген (Белград, 2020-ж.).
Байгелүү орундар үчүн күч сынашуулар Токиодо кечки саат 18.00дө, бишкек убактысы боюнча түштөн кийин 15.00дө башталат.
Кыргызстандык балбандардын маанайлары, даярдыктары жакшы экенин башкы устаттар Азат Эркинбаев менен Нурбек Изабеков айтты.
Күрөш мелдештерин баштай турган балбандарга ийгилик каалап, сүрөөнгө алып туралы.
Токиодон пресс-атташе, спорттук баяндамачы Кабыл Макешов
31-июлда оор атлетика боюнча Токио шаарынын Токио эларалык Форум имаратындагы олимпиадалык мелдешине кыргыз спорт чебери Бекдөөлөт Расулбеков катышты. Аны устаттары Өмүржан Молдодосов менен Камбар Токтоналиев коштоп акыл-насааттарын айтып турушту. Ал 96 кг салмактагы чоюн билек 10 балбан менен олимпиадалык байге үчүн күч сынашты. Бул салмакта 15 спортчу мөрөй талашса, анын ону «А» тобундагы балбандар болду. Мелдеш бишкек убактысы боюнча 16.50дө башталды. Бекдөөлөт жулкуп көтөрүүдө алгач 162 кг салмакты багындырды. Экинчи жолку аракетинде 165 кг салмакты көтөрө албай койду. Үчүнчү жолку чыгууда 166 кг салмакты көтөрдү. Бул көнүгүүдө канадалык Сантай Роберт 178 кг салмакты көтөрүп топ башында турду. Түртүп көтөрүүдө Бекдөөлөт алгач 200 кг салмакты багындырды. Кийинки чыгууда 208 килограмм салмакты көтөрдү. Соңку чыгууда 216 кг салмакты көтөргөнү менен сол колу ооп кетип, штанга помостко түшүп кетти. Ошентип ал жалпы 374 килограмм салмакты багындырды.
1-орунду Катардын спортчусу Элбах Фарес Ибрахим алды. Ал 402 килограмм салмакты көтөрүү менен Олимпиаданын рекордун да жаңыртты. Спортчу булкуп көтөрүүдө 177 килограмм, түртүп көтөрүүдө 225 килограммды көтөрдү.
Күмүш жана коло байгелерди 387 килограммды эсебине жазган Венесуэла спортчусу Кейдомар Валенилья (177 кг, 210 кг.) менен Грузиянын өкүлү Антон Плесной жеңип алды.
Бекдөөлөт Расулбеков 1996-жылы Токтогул районунун Кайрак айылында туулган. 2011-жылдан бери оор атлетика менен машыгып, 94, 96 жана 102 килограмм салмак категорияларында өлкө намысын коргоп келатат. 2016-жылы өспүрүмдөр арасындагы Азия чемпионатынын коло медалынын ээси болгон. 2019-жылдагы Дүйнө чемпионатында ал алдыңкы ондукка кирген. Билими боюнча – программист. Техносфера коопсуздугу боюнча экинчи адистикти алган.
Бекдөөлөт 2021-жылы февраль айында Ирандагы жана Өзбекстандагы турнирлердин жеңүүчүсү болуп саналат. Март айында ал атаандаштарынан 80 килограммга озуп, Кыргызстандын беш жолку чемпиону болгон эле.
– Жаш кезинде таятам машыккан экен. Бул анын хоббиси болчу. Ал кесипкөй оор атлетчи болууну кыялданган, бирок мүмкүнчүлүк болгон эмес. Анын кыялын ишке ашыргым келип, оор атлетчи болдум. Жеңиштеримди таятама жана кыргыз элине арнап келген. Бирок тилегим орундалбай калды. Эмдиги жылы Азия оюндары болот. Ошондо дагы тажрыйба топтоп, кийинки Париж шаарында өтө турган олимпиадага жолдомо алып, бул жолку каталыктарымды оңдоого аракет кылам. Токио олимпиадасына биринчи ирет катышып жаткандыктан катачылыктар кетип калды. Кыргызстанды эл аралык аренага тааныткан оор атлетчилер Митал Шарипов, Улан Молдодосов, Бекзат Осмоналиев агайлардай болгум келип, бул спортту тандап алгам. Аягына чейин чыгып, бир натыйжага ээ болгум келет,-дейт Бекдөөлөт Расулбеков.
Эгемендүү өлкө болгону 2000-жылы Сидней олимпиадасына Митал Шарипов менен Бакыт Ахмедов катышып, 16-орунду ээлеген. 2004-жылкы Афина жана 2008-жылкы Бээжин олимпиадаларына Улан Молдодосов катышып, 10-11-орун менен чектелген. 2012-жылы Лондон олимпиадасында Бекзат Осмоналиев байгелүүң орунга илинбей калган. 2016-жылы Рио-де-Жанейро олимпиадасына кыздардан Жаңыл Океева катышып, 10-орунга жеткен. Ал эми 69кг салмакта коло байге уткан Иззат Артыковдун кызытма пайдалаганы билинип калып, байгесинен айрылып, оюндан четтетилген.
Ошентип эгемен өлкө болгону Бекдөөлөт Расулбеков олимпиадалык оюндарда байгелүү делип, атайын упай жана сертифиат берилген 6-орунду ээлегени дагы дурус көрсөткүч. Токиодогу спорт адистердин айтымында Бекдөөлөттүн келечеги кең, алдыда дагы Азиялык, дүйнөлүк таймашуулары турат. Башты жерге салба, Бекдөөлөт!!!
Бүгүн, 31-июлда Токио шаарындагы Макухари Мессе Борборунда олимпиада оюндарында күрөш боюнча эртең, 1-августта килемге чыга турган кыргыз балбандарынын алгачкы атаандаштары аныкталды. Бул тууралуу Токио шаарынан Кыргызстандын олимпиадалык командасынын басма сөз катчысы, спорттук баяндамачы Кабыл Макешов билдирди.
Эртең күрөш өтө турган бул жерде балбандар чучукулак кармалды. Алар эртең, 1-августта,бишкек убактысы боюнча саат 08:00дө килемге чыгып, алгачкы атаандаштары менен күч сынашат.
Грек-рим күрөшүнөн 60 килограмм салмак боюнча Токио олимпиадасына катышып жаткан Жоламан Шаршенбековдун алгачкы атаандашы казакстандык Мейрамбек Айнагулов болду.
Дүйнө чемпионаттарынын күмүш (2017) жана коло (2019) медаль байге ээси Мейрамбек Айнагулов 27 жашта. Ал дагы Олимпиадага алгачкы ирет катышууда. Буга чейин Азия чемпионаттарында экинчи, үчүнчү орундарды ээлеген.
22 жаштагы Жоламан Шаршенбеков быйыл апрель айында Алматыда (Казакстан) өткөн лицензиялык Азия континенталдык турниринде баш байгенин ээси болуп, Олимпиадага жолдомо уткан. Ошондой эле Жоламан Дүйнө кубогунун алтын медалынын жеңип, жаштар жана чоңдор арасындагы дүйнө чемпионатынан күмүш медалын уткан. Жоламандын спорттук ийгиликтери тууралуу учкай айта кетели:
Грек-рим күрөшү боюнча Кыргыз Республикасынын эл аралык даражадагы спорт чебери Шаршенбеков Жоламан Назарбекович 1999-жылдын 29-сентябрында Талас областынын Манас районунун Бала-Саруу айылында төрөлгөн. Грек-рим күрөшү менен 3-класстан машыгып келет.
Раатбек Санатбаев атындагы олимпиадалык резерв балдар, өспүрүмдөр спорт мектебинде Кыргыз Республикасынын эмгек сиңирген машыктыручуусу Махмудов Хаким Махмудовичтин кол алдында машыгат.
Шаршенбеков Жоламан Спорттук жетишкендиктери:
2015-жылдын уландар арасында Азия Чемпионатында 1 орун;
2016-жылдын жаштар арасында Азия Чемпионатында 3 орун;
2016-жылдын жаштар арасында Дүйнө Чемпионатында 3 орун;
2017-жылдын жаштар арасында Азия Чемпионатында 2 орун;
2017-жылдын жаштар арасында Дүйнө Чемпионатында 2 орун;
2018-жылдын Азия Чемпионатында 2 орун;
2018-жылдын Дүйнө Чемпионатында 2 орун;
2019-жылдын U 23 Дүйнө Чемпионатында 2 орун;
2020 – жылдын Дүйнө Кубогунда 1 орун;
2020 – жылдын Азия Чемпионатында 2 орун;
2021 – жылдын Азия лицензиялык мелдешинде 1 орун (2021-жылдын Олимпиада оюндарына жолдомо)
Азыркы учурда Жоламан Шаршенбеков Кыргыз Республикасынын дене тарбия жана спорт Академиясында 4- курста окуйт.
Оңдой берди болуп, Жоламан казакстандык атаандашын утса, чейрек финалда түркиялык же молдовалык балбан менен күч сынашат.
Бүгүн, 31-июлда Токио шаарындагы Макухари Мессе Борборунда олимпиада оюндарында кыз-келиндердин күрөшү боюнча эртең, 1-августта килемге чыга турган кыргыз балбан кызы Айпери Медет кызынын дагы алгачкы атаандаштары аныкталды.
76 килограмм салмакта Айпери Медет кызы да казакстандык Элмира Сыздыкова менен күрөшөт.
Айперинин алгачкы атаандашы 29 жаштагы Элмира Сыздыкова дасыккан, тажрыйбалуу балбан болуп саналат. Ал 2016-жылы Рио-де Жанейро шаарында өткөн Олимпиада оюндарынын коло байгесин уткан. Ошондой эле Азия чемпионаттарынан күмүш, коло медалдарын утуп, бир да жолу Азия чемпиону болгон эмес.
Кыргызстандык күйөрмандардын үмүтүн жандырган 22 жаштагы Айпери Медет кызы жаштар арасындагы дүйнө чемпиону жана эки коло байгенин ээси болуп саналат. Ошону менен бирге 2020-жылы Азия чемпиону аталган. Айперинин дагы спорттук ийгиликтерин учкай айта кетели.
Кыз-келиндер эркин күрөшү боюнча эл аралык спорт чебери Айпери Медет кызы 1999-жылы 30-мартта Талас облусунун Кара-Буура районунда туулган. Ал 2020-жылы Дүйнө кубогунун, Азия чемпионатынын жана Азия оюндарынын жеңүүчүсү болуп саналат.
2017-жылы Түркмөнстандын Ашхабад шаарында өткөн жабык имараттагы жана чыгыш өнөрү боюнча Азия оюндарында 75 килограммга чейинки салмакта коло медалга ээ болгон. Финляндияда өткөн жаштар арасындагы дүйнөлүк чемпионатта ал бардык атаандаштарын жеңип алган. Ал Кыргызстандан чыккан жаш кыздар арасындагы биринчи дүйнө чемпиону.
Эске салсак, Финляндиянын Тампере шаарында 2017-жылы 1-6-август аралыгында өткөн жаштар арасындагы күрөш боюнча Дүйнө чемпиондугунда Айпери Медет кызы финалда япониялык балбан Ясухи Мацуюки менен беттешип, 8:6 эсеби менен жеңип алган.
2018-жылы Жакартадагы Азия оюндарында Айпери мелдештин коло медалына татыктуу болгон.
2019-жылы Венгриянын Будапешт шаарында өткөн эркин күрөш боюнча жаштар арасындагы Дүйнө чемпиондугунда 76 килограммга чейинки салмакта коло байгенин ээси болгон.
2020-жылы Индиянын Нью-Дели шаарында өткөн күрөш боюнча Азия чемпионатында 76 кг салмакта күмүш медаль тагынган.
2020-жылы декабрда, Сербиянын борборундагы Дүйнөлүк Кубокто, 76 кг салмакта коло медалды жеңип алган.
Айпери бир нече ирет эл аралык турнирлерде байгелүү орундарды ээлеген. Ал быйыл Алматыда өткөн континенталдык жолдомо ойнотулган турнирде 76 кг салмакта финалга чейин жетип, Токио олимпиадасына жолу ачылган. Аны олимпиадалык оюндарга даярдаган устаты, Кыргызстанга эмгек сиңирген машыктыруучу Нурбек Изабековдун мээнети тоодой.. Айперинин алгачкы устаты Кыргызстанга эмгек сиңирген машыктыруучу Дүйшөн Жуманазаров.
Оңдой берди болуп, Айпери казакстандык атаандашын утса, чейрек финалда орусиялык же египеттик балбан менен күч сынашат.
Кыргызстандык балбандардын маанайлары, даярдыктары жакшы экенин башкы устаттар Азат Эркинбаев менен Нурбек Изабеков айтты.
Күрөш мелдештерин баштай турган балбандарга ийгилик каалап, сүрөөнгө алып туралы.
2021-жылдын 23-июлунда Кыргыз Республикасынын президентинин администрациясынын жетекчисинин орун басары Адылбек Касымалиев башында турган, курамына Кыргыз Республикасынын Маданият, маалымат, спорт жана жаштар саясаты министри Кайрат Иманалиев, министрдин орун басары – Жаштар иштери, дене тарбия жана спорт мамлекеттик агенттигинин директору Канат Шабданбаев кирген Кыргыз Республикасынын расмий делегациясы Токио-2020 32-Жайкы Олимпиада оюндарынын ачылыш аземине катышты. Бул тууралу ТИМдин басма сөз кызматы билдирет.
Ошол эле күнү Кыргыз Республикасынын Маданият, маалымат, спорт жана жаштар саясаты министри Кайрат Иманалиевдин Токиодогу Олимпиада жана Паралимпиада оюндарын өткөрүү боюнча Япониянын министри Тамайо Марукава, ошондой эле Япониянын Билим берүү, маданият, спорт, илим жана технологиялар министри Хагиуда Коити менен эл аралык жана эки тараптуу спорт тармагындагы күн тартиби боюнча өз ара аракеттенүү тууралуу кыска жолугушуулары болуп өттү.
2021-жылдын 26-июлунда кыргыз делегациясынын Япониянын Өкүлдөр палатасынын депутаты, Кыргыз Республикасы менен достук лигасынын лидери Ген Накатани менен жолугушуусу болуп өттү.
Тараптар социалдык-экономикалык жана маданий-гуманитардык чөйрөлөрдөгү эки тараптуу кызматташуунун актуалдуу багыттарын, ошондой эле эки өлкөнүн аймактарынын ортосунда байланыштарды орнотуу жана чыңдоо маселелерин талкуулашты. Мындан тышкары, 2022-жылы Кыргыз Республикасы менен Япониянын ортосунда дипломатиялык мамилелердин түзүлгөндүгүнүн 30 жылдыгын майрамдоого арналган биргелешкен иш-чараларды өткөрүү боюнча пикир алмашуу болду.
Сапардын алкагында, ү.ж. 27-июлунда Кыргыз Республикасынын делегациясы Япониянын “Muroo Systems Co. Ltd” компаниясынын өкүлдөрү менен жолугушуп, анда тараптар маалыматтык технологиялар жаатында кызматташууну өнүктүрүүнүн келечегин талкуулашты.
Жолугушуунун жыйынтыгында япониялык компаниянын Кыргызстанга иш сапарын уюштуруу жана КРнын тиешелүү органдары менен кеңейтилген жолугушуу өткөрүү тууралуу макулдашылды.
