Menu

Эмгек мигранттары

Москвада кыргыз жаранынын өлүмүнө шектүү кармалды

Москвада кыргыз жаранынын өлүмүнө шектүү кармалды. Бул тууралуу 22-ноябрда Кыргызстандын Тышкы иштер министрлиги (ТИМ) билдирди.

Киши колдуу болгон сөөк табылганына байланыштуу окуя тууралуу кыска маалымат берген мекеме ал адам Кыргызстандын 50 жаштагы жараны экенин, Москвада такси айдоочусу болуп иштеп жүргөнү аныкталганын маалымдады.

Факты боюнча Москванын Кунцево райондор аралык тергөө бөлүмүндө Орусиянын Кылмыш-жаза кодексинин 105-беренеси (“Адам өлтүрүү”) менен иш козголуп, тергөө жүргүзүлө баштады.

Кыргызстандын миллиондон ашуун жараны бүгүнкү күндө Орусияда эмгек мигранты болуп жүрөт.

ТИМдин расмий маалыматына караганда, былтыр Кыргызстанга четтен 540 “Жүк-200” келсе, быйыл алгачкы беш айда 292 мигранттын сөөгү мекенине жеткирилди.

Кыргыз элчиси Өмүрбек Текебаев Германияда кыргыздарды 2023-жылкы кулпунай жана спаржа өстүрүү сезондук жумуштарына тартууга аракет кылууда

Кечээ, 15-ноябрда Берлин шаарында Кыргыз Республикасынын Германия Федеративдʏʏ Республикасындагы Элчиси Ө.Ч.Текебаев Германиянын Тюрингия Федералдык аймагында жайгашкан кулпунай жана спаржаны ɵстурʏʏ, чогултуу жана сатуу боюнча «Erdbeerhof Gebesee GmbH» компаниясынын Аткаруучу директору Андреа Лееферс менен жолугушту.
Бул компаниянын аткаруучу директору А.Лееферс 2023-жылы Кыргызстандан жумушчуларды сезондук жумушка тартууга өзүнүн компаниясы кызыкдар экенин билдирди.
Элчи Ө.Ч.Текебаев Германияда Кыргыз Республикасынын жарандарын уюшкандыкта ишке орноштуруу боюнча системалуу жана узак мөөнөттүү кызматташуунун маанилүүлүгүн белгилеп, Элчилик Кыргыз Республикасынын жарандарын аталган компанияга ишке орноштурууга көмөк көрсөтүүгө даяр экендигин билдирди.
Маалымат: «Erdbeerhof Gebesee GmbH» – бул кулпунай жана спаржа өстүрүү, чогултуу жана сатуу боюнча адистешкен айыл чарба компаниясы болуп эсептелет. Компания жыл сайын жайында кулпунай жана спаржа чогултуу жана сатуу боюнча жумушчуларды ишке тартат. Сезондук жумуш апрелден июлга чейин созулат.

Орусиядагы тажик мигранттары оккупацияланган Мариуполду калыбына келтирүүгө жөнөтүлдү

Орусиянын курулуш компаниялары оккупацияланган Мариупол шаарын калыбына келтирүүгө тажик мигранттарын жөнөттү. Бул тууралуу “Озоди” радиосу кабарлады.

Радионун кабарчысы менен байланышка чыккан 30 жаштагы Курбон Шарифов Мариуполдо август айынын аягынан бери иштеп жатканын билдирди. Анын айтымында, аларды Мариуполго буга чейин тажик мигранттары иштеп келген Москвадагы “Реставрация” курулуш компаниясы жөнөткөн. Алгачкы ай үчүн куруучуларга 130 миң рублден (2350 доллар) маяна төлөшкөн. Бул тажикстандык куруучулар Москвада алган айлыктан эки эсеге көп.

“Кийинки айларда да ушундай айлык төлөйбү билбейбиз. Бул жакта талкаланган үйлөрдү калыбына келтирип, терезелерин алмаштырып, чатырларын жаңыртып жатабыз. Бизди убактылуу турак жай жана үч маал тамак менен камсыз кылышты”, – деди Шарифов.

Мариуполго жөнөтүлгөн тажик мигранттарынын так саны белгисиз. Шарифовдун айтымында, “Реставрация” курулуш компаниясы эле бул шаарга 110 киши жөнөткөн. Алардын көбүн Тажикстандын жарандары түзөт. Мариуполго жумушчуларды жөнөтүү менен башка курулуш компаниялар да алектенүүдө.

Орусияда анча чоң эмес курулуш компанияларга ээлик кылган Тажикстандын айрым жарандары да Мариупол шаарын калыбына келтирүүгө жумушчуларды жөнөтүп жатышат. Аты-жөнүн жана фирмасынын аталышын айтуудан баш тарткан алардын бири Мариуполго 30 миң курулушчу жөнөтүүгө буюртма келгенин билдирди.

“Кечээ автобус менен жумушчулардын тобун жөнөттүк. Бүгүн алар иштей башташты. Биздин жумушчулардын көбүн Тажикстандан жана Өзбекстандан келген мигранттар түзөт”, – деди ал.

Тажикстандын Орусиядагы элчилиги тажик жарандарын Мариуполду калыбына келтирүү иштерине жөнөтүү боюнча орус бийлигинен расмий билдирүү болбогонун айтышты. “Айрым мекендештерибиз бул боюнча бизге телефон чалышкан. Биз аларга кооптуу аймактарга барбоо кеңешин бердик”, – деди элчиликтин өкүлү.

Мариупол – Украинанын Донецк облусунун өнөр жай борбору жана Азов деңизиндеги ири эл аралык соода порту болуп эсептелет. Бул шаар үчүн кармаш 2022-жылдын 25-февралында башталып, май айында гана орусиялыктардын карамагына өткөн.

Элчилик: Орусияда убактылуу жүргөн кыргызстандыктар аскерге чакырылбайт

Кыргызстандын Москвадагы элчилиги чет өлкөлүк жарандарды, анын ичинде Орусиянын аймагында убактылуу жүргөн Кыргызстандын жарандары аскердик кызматка чакырылып жаткандыгы тууралуу маалыматтардын таркашына байланыштуу билдирүү таратты.

Элчилик бул маалыматтарды төгүндөп, жарандарды такталбаган маалыматтарды таратпоого чакырды.

“Элчилик социалдык тармактарда чет өлкөлүк жарандарды, анын ичинде Орусиянын аймагында убактылуу жүргөн Кыргызстандын жарандарын мобилизациялоо боюнча аскердик кызматка чакыруу жөнүндө маалыматтардын таркашына байланыштуу, анда көрсөтүлгөн бардык маалыматтар чындыкка дал келбестигин билдирет”, – деп жазылган маалыматта.

21-сентябрда Орусиянын президенти Владимир Путин жарым-жартылай мобилизация жарыялаган. Коргоо министри Сергей Шойгу бул боюнча мамлекет башчынын жарлыгынын алкагында 300 миңдей резервисттер аскерге тартыларын айткан. “Новая газета. Европа” басылмасы жарлыктын жашыруун деп мүнөздөлгөн 7-пунктуна ылайык, 1 миллионго жакын адам мобилизацияга тартыларын жазды.

Путин мобилизация жарыялангандан бери орусиялыктар чет өлкөлөргө, анын ичинде Борбор Азияга агылууда.

Буга чейин Кыргызстандын Тышкы иштер министрлиги (ТИМ) Орусияда жарыяланган мобилизациялоо кимдерге тийиштүү экени тууралуу түшүндүрмө берген.

Депутат Нуржигит Кадырбеков миграция тармагына жооп берген өзүнчө мамлекеттик орган түзүүнү сунуштады

Жогорку Кеңештин 8-сентябрда өткөн жыйынында айрым депутаттар мигранттар маселесин көтөрүштү. Нуржигит Кадырбеков миграция тармагына жооп берген өзүнчө мамлекеттик орган түзүүнү сунуштады.

“Миграция маселесин ар дайым ар кайсы мекеменин карамагына – бир туруп Социалдык өнүгүү министрлигине, бир туруп Саламаттык сактоо министрлигине, бир туруп Тышкы иштер министрлигине берип коебуз. Бир киши жооп бергидей өзүнчө түзүм керек. Мындан тышкары мигранттарды даярдоо боюнча программа кабыл алуу шарт, себеби жаштар мектепти бүткөндөн кийин паспорт алып, эч нерсени билбей четке кетип калууда, алданып, түрмөгө түшүүдө”, – деди депутат.

Эл өкүлү Эмил Жамгырчиев мигранттардын укугун коргой турган өзүнчө омбудсмен керек деп эсептейт. Ал мигранттардын көйгөйлөрүн кандайдыр бир трагедия болгон учурда гана эстешет деген пикирде.

Августа Орусиянын Ульяновск облусундагы ири жол кырсыгынан 14 кыргызстандык набыт болгондон кийин акыйкатчы Атыр Абдрахматова Орусияда Кыргызстандын укук коргоо органынын өкүлчүлүгүн ачууну сунуштаган.

Акыркы расмий маалыматка караганда, чет өлкөлөрдө 1 млн 118 миң кыргызстандык убактылуу жашат жана иштейт. Алардын 1 млн 63 миңи Орусияда.

ТИМ: Россиянын Златоуст шаарына жакын жерде кыргыз жарандары жол кырсыгына кабылып, 6 киши жаракат алды, бир кыздын абалы оор

Кечээ, 7-сентябрда Челябинск облусунун Златоуст шаарына жакын жердеги М-5 унаа жолунда Кыргыз Республикасынын жараны К.Ш.нын башкаруусундагы «Рено Логан» (жеңил унаа) каршы тилкеге чыгып кетип, натыйжада Volvo үлгүсүндөгү оор жүк ташуучу унаа менен кагышкан.

Унаанын ичинде алты адам болгон, баары бир үй-бүлө мүчөлөрү – ата-энеси жана алардын төрт баласы. Баары Кыргызстандын жарандары. Жүргүнчүлөрдү ташыган айдоочунун жубайы жана балдары Оштон Уфага учак менен келген. К.Ш. үй-бүлөсүн Уфанын аэропортунан тосуп алып, көрсөтүлгөн унаа менен Нижневартовск (ХМАО – Югра) шаарына бара жаткан.

Кырсыктан жабыркаган кыргызстандыктар тез жардам кызматы менен Златоуст шаарындагы шаардык клиникалык ооруканага жеткирилди.

7-сентябрда жергиликтүү убакыт боюнча саат 15:00дө К.Ш.нын кызы – З.Р. (12 жашта) операция болгон. Кыздын абалы оор. Калган үй-бүлө мүчөлөрүнүн абалы канааттандырарлык, алар учурда жогоруда аталган оорукананын травматология бөлүмүндө.

Бул окуя Башкы консулдуктун көзөмөлүндө, оорукананын кызматкерлери, МАИ кызматкерлери жана жабыркаган кыргызстандыктар менен байланыш түзүлүп жатат.

ИИМ: Россияда кыргыз эмгек мигранттарын уурдап, сабап, опузалап акчаларын тартып алып жүргөн кылмыштуу топтун мүчөлөрү кармалды

Кыргыз Республикасынын Ички иштер министрлигинин Россия Федерациясындагы Өкүлчүлүгүнүн жардамы менен Москва шаарында өз мекендештерин опузалап талап кылуу, уурдоо менен алектенип жүрүп мурда кармалган кылмыштуу топтун жашырып жүргөн дагы мүчөлөрү аныкталып, убактылуу кармоочу жайга киргизилди.
ИИМдин Россия Федерациясындагы Өкүлчүлүгүнүн маалыматына ылайык, Москва шаарынын жана Москва облусунун аймагында ишкерлик кылган өз мекендештерин опузалап талап кылуу, уурдоо менен алектенген туруктуу уюшкан кылмыштуу топ иш жүргүзүп келген.
Маалыматка ылайык, 2022-жылдын май айында Москванын Марьина-Роща районунун аймагында кылмышкерлер  күч колдонушуп, бычак менен коркутушуп, Кыргызстандын жаранын унаага салып, анын эркине каршы белгисиз тарапка уурдап кетишкен. Андан соң аны батирде кармап, 1 000 000 рубль акча талап кылышып, андан соң сабап, 78 000 рублин алып кетишкен. Эртеси бул кылмыштуу топтун мүчөлөрү кылмыштуу ниетин улантып, жабырлануучунун 65 миң рублдик мүлкүн алып кетишкен.
Буга байланыштуу ИИМдин Россия Федерациясындагы Өкүлчүлүгү  Россиянын ИИМдин Москва шаары боюнча башкы башкармалыгынын кылмыш иликтөө башкармалыгынын ыкчам кызматкерлери менен биргеликте бул топко тиешеси бар адамдарды табуу жана аныктоо боюнча бир катар комплекстүү ыкчам-иликтөө иш-чараларын жүргүзүштү.
Жогорудагы факты боюнча Россиянын Тергөө комитети тарабынан Россия Федерациясынын Кылмыш-жаза кодексинин 126,163-беренелери (“Адамды уурдоо, опузалап талап кылуу) менен кылмыш иши козголгон.
2022-жылдын 23-август күнү Россиянын ИИМдин  тиешелүү башкармалыктарынын ыкчам кызматкерлери Росгвардиянын ыкчам чараларды көрүү атайын отрядынын күжүрмөн колдоосу менен шектүүлөр Москва шаарынын аймагынан кармалышкан.
-Кыргыз Республикасынын жараны, Талас облусунун тургуну 1993-жылы туулган М.Э.. Алынган маалыматтар боюнча кармалган жаран “Савалев базарындагы кыргыздар үчүн смотрящий” криминалдык статуска ээ;
– Экинчи шектүү Кыргыз Республикасынын жараны, Жалал-Абад облусунун тургуну  2000-жылы туулган Ж.уулу Н..

Учурда бул фактылар иликтенип, алардын мурда жасалган башка оор кылмыштарга катыштыгы бар же жоктугу текшерилүүдө. Жогорудагы адамдар мурда кармалган кылмыштуу топтун активдүү мүчөлөрү болушат.
Буга чейин маалымдалгандай, үстүбүздөгү жылдын июнь айында Москва шаарында жана Москва облусунда «криминалдык авторитеттин» тапшырмасы менен иш алып барган уюшкан кылмыштуу топ кармалган. Алар акча талап кылуу менен алектенип, ишкердик менен алектенген жарандарга көзөмөлдү уюштурууга аракет кылышкан.
Кылмыштуу топту Нарын облусунда 1988-жылы туулган А.А. башкарып келген. Ал мурда бир катар оор кылмыштар үчүн соттолгон жана “Карагер” каймана аты менен уюшкан кылмыштуу топтун активдүү мүчөсү катары  ИИМдин ыкчам каттоосунда турат.
Жогорудагы кылмыштуу топтун 7 мүчөсүн кармоо операциясы ИИМдин Россия Федерациясындагы Өкүлчүлүгүнүн катышуусу менен жүргүзүлгөн.
Учурда  ИИМдин Россия Федерациясындагы Өкүлчүлүгү КМШнын Уюшкан кылмыштуулукка жана башка оор кылмыштар менен күрөшүүнү координациялоо боюнча бюросунун директорунун Кыргыз Республикасы боюнча орун басары А.Алиев менен бирдикте биздин мекендештерибиздин арасында криминогендик кырдаалга мониторинг жүргүзүүнү улантышып, кылмыштуулуктун алдын алуу боюнча профилактикалык чараларды көрүшүүдө.

Орусияда жол кырсыгынан каза болгондордун сөөгү жерге берилди

Бул тууралуу президенттин Ош облусундагы өкүлчүлүгүнүн басма сөз катчысы Эрмек Муратбек уулу билдирди.

Маркумдардын сөөктөрү өздөрү туулуп-өскөн айылдарына коюлуп, ага өкмөт өкүлдөрү катышты.

Ош облусу:
1. Абдулхамид уулу Жакыпбек – 20.08.1990, Араван району, Гүлбаар айылы.
2. Бекмурзаева Диана Акылбековна – 04.09.1998, Ноокат району, Төөлөс айыл аймагы, Муркут айылы.
3. Кутманали уулу Сыймыкбек – 22.07.1999, Араван району, Гүлбаар айылы.
4. Сулайманова Уулкан Хакимовна – 15.10.1976, Кара-Суу району, Кенжекул айылы.

Орусиянын Ульяновск облусунда 21-августта ири жол кырсыгында 16 адам, анын ичинде 14 кыргыз жараны мерт болуп, дагы үчөө жараат алган. Каза болгондордун бешөө Баткен, бешөө Жалал-Абад, төртөө Ош облусунун тургундары. Калган эки облуста маркумдардын сөөгү жакындарына өткөрүлүп берилди.

Маркумдардын сөөктөрү атайын учак менен 23-август күнү кечке учак менен Ошко алып келинди. Жарандарынын өмүрүн алган жол кырсыгына байланыштуу кечээ, 23-августта Кыргызстан аза күттү.

Россиядагы жол кырсыгынан каза болгон кыргыз жарандарынын сөөгү салынган атайын учак Ош аэропортуна келип конду

Ош шаарынын аэропортуна Россия Федерациясынын  Ульяновск областындагы жол кырсыгынын натыйжасында каза болгон 14 мекендешибиздин сөөгү салынган атайын борт келди.

Тийиштүү уюштуруу иштерин жана башка маселелерди чечүү үчүн Кыргыз Республикасынын Министрлер Кабинетинин Төрагасынын орун басары Бакыт Төрөбаев, Президенттин Администрациясынын Президенттин жана Министрлер Кабинетинин чечимдерин даярдоо боюнча башкармалыгынын начальниги Айбек Жунушалиев, Кыргыз Республикасынын Президентинин Иш башкаруучусу Каныбек Туманбаев, ошондой эле тийиштүү мамлекеттик органдардын жана жергиликтүү бийлик органдарынын жетекчилиги жеринде иш алып барууда.

Каза болгондордун туугандарына Президент Садыр Жапаровдун атынан материалдык жардам көрсөтүлөт.

Белгилей кетсек, Мамлекет башчынын Жарлыгы менен 23-август Кыргыз Республикасында улуттук аза күтүү күнү деп жарыяланган.

Россияда жол кырсыгынан каза болгон 14 кыргыздын сөөгү атайын учак менен Кыргызстанга жөнөтүлдү

Орусиянын Ульянов облусунда жол кырсыгынан каза тапкан 14 кыргызстандык жарандын сөөгү атайын учакка жүктөлүп, бүгүн, 23-августта жергиликтүү убакыт боюнча саат 11:10до Кыргызстанга учуп чыкты. Алдын ала маалымат боюнча 3,5 саат аралыгында Кыргызстандын Ош шаарындагы аэропортуна конору күтүлүүдө.
Ульянов шаарына КР Өзгөчө кырдаалдар министри Бообек Ажикеев, КР Президентинин администрациясынын Президенттин жана Министрлер Кабинетинин чечимдерин даярдоо боюнча башкармалыгынын башчысы Айбек Джунушалиев, Орусиядагы Кыргызстандын консулу Манас Жолдошбеков жана элчиликтин өкүлү Доорбек Абдразаков жеринде РФ ӨКМнин Ульянов облусун башкы башкармалыгынын башчысы, генерал-майор Михаил Осокин жана орун басары, полковник Михаил Николаев менен жолугушуп, тийиштүү иш-чаралар жүргүзүлдү.
Меню