– Мурадил, учурда канча жаштасыз?
– Азыркы учурда 22 жаштамын. Жалал-Абад шаарынын кулуну боломун. Кесибим боюнча юрист.
– Ушул таптарда эмне менен алексиз?
– Азыр жаңы ырларды жаздыруу менен алек болуп жатамын. Ар кандай кино тасмаларга чакыруу болгондуктан өзүмдү кино тармагынан да сынап көрөюн да ал тарапка да аракет кылып жатамын.
– Жаңы ырларды жаздыруу менен алектенип атасыз, алгачкы ырыңды кайсы багытка арнадыңыз?
– Ырларды жаздырууда ар тараптуу жана багыты көп болот деп ойлоймун. Анткени ар жаралып жаткан чыгарма жакшылыкка жана сүйүүгө кыздардын сулуулугуна жана башка тараптарга кете берет. Андыктан мен элим жеримди сүйгөн патриот болгондуктан, Мекенге болгон ырларды жаратып, алгачкы ырымды кыргыздын сулуу кыздарына арнадым.
– Алгачкы сиз жараткан ырдын кыйынчылыгы жана кубанычы эсиңизде калдыбы?
– Албетте, кыйынчылык көп болду. Бир эле ырдын жаралышы үчүн бир канча убакыт өттү. Ошол бир эле жазылган ыр бир нече ирет жазылып, 3 мүнөттүк ыр көптөгөн талаш-тартышка алып келип, оюңдагы нерсени алып чыгуу кыйынчылыкка тургандыгы байкалды. Кубаныч жагына токтоло кетсек, биринчи жолу клипти туугандарыма көрсөттүм. Өзүңдүн алгачкы кубанычка чек жок да. Досторума өзүм чалып, өзүмдүн жакшы жаңылыгымды өзүм жарыя кылдым.
– Аранжировка жасоодо дегеле клип тартууда канча акча каражаты сарпталды?
– Чындыгын айтканда бир жумуштун башын баштап бүтүрүп кетүүнүн азабы менен тозогун, кыйынчылыгы менен кыйын кырдаалын эң жакшы болбосо дагы жакшы түшүндүм. Канчалык кыйналсам дагы ошол кыйынчылыктар мага жагып атты. Кыйынчылыктын артын ийгилик коштойт эмеспи.
– Азыр сизе тийиштүү канча ырлар бар?
– Азыркы учурда өзүмдүн репертуарымда “Сулуулар кайдан жаралат?”, “Бул сүйүү” деген эки ырым жарыкка чыкты. Жакында үчүнчү ырды жаздырабыз. Сөзү жана обону даяр. Учурда чыгармачылыктын үстүндө кызуу иштеп жатабыз.
https://youtu.be/nEnMrsW_teY?list=PL3JmammKNxC0wZCjvmM9tcjJKW6t-9RbC
– Чыгарамчылыкка качандан бери аралаштыңыз?
– Мен, чыгармачылык аралашканыма 2015-жылы сентябрдан бери аралашып келе жатамын. Тактап айтканда 7 ай эле болду. Кудай буюрса, 7 айдын ичинде жакшы ийгиликтерге жетишип, 2 ыр жаратып, бир канча кино тасмаларга тартылдым.
– Негизи эл арасында буга чейин аралашып жүргөнсүзбү?
– Чыгармачылык чөйрөгө аралашканыма 5 жыл болуп калды. Тойлордо ырдап, элге кызмат кылып дегендей. Эми мындан кийин өзүмдүн кийинки багытымды шоу тарапка толугу менен арнаймын деген тилекте турамын.
– Музыкалык аспаптарды ойногонго жөндөмүңүз барбы, кайсыл аспаптар?
– Аккардеонду мен 3-класстан баштап эле ойногонмун. Гитара ойногонго жөндөмүм бар. Келечекте көптөгөн музыкалык аспаптарды багындырамын деген ойдомун.
– Учурда элдер жасалма үндөн тажап, жандуу ырдаган ырчыларга ооп бара жаткандай. Сиз, “оппа” дегенде эле “фонограмма” менен баштаган жоксузбу?
– Мен “фонограмма” ырдабаймын деп актанбаймын. Бирок менен жандуу ырдаганга дагы мындай ырдаганга дагы даярмын. Анткени аккардеон менен кантип жандуу ырдаса болот? Ошондуктан чын эле чыгармачылык дүйнөгө аралашкандан кийин “до” нотасынан баштап, акыркы “до” нотасына чейин даяр болуш керек деп ойлоймун.
– Алдыдагы кадамдарды кайсыл тарапка таштайын деп турасыз?
– Алдыга койгон кадамдар алгач аруу жана таза болуп турса, кыялдарым дүйнө жүзүнө таанылуу, ата – энемдин ак сүтүн актоо. Кыргыз элиме жагымдуу ырларды тартуулап, “КР Эмгек сиңирген артисти” деген наамды алуу. Мына ушулардын баары жана айтылбай калган аруу тилектерим ишке ашса экен деп ойлоймун.
– Маегиңизге рахмат.
Гүлжан Шерипбаева, Кyrgyztoday.kg
КОММЕНТАРИЙ КАЛТЫРУУ