“Аксы районуна караштуу Жаңы-Жол айыл өкмөтү маданият үйүнө жана бала бакчага муктаж”, — деп билдирди бүгүн, 6-апрелде Кyrgyztoday.kg маалымат агенттигине Аксы районунун жергиликтүү депутаты Жанарбек Надырбеков.
“Президенттин жарлыгы менен 2016-жыл «Тарых жана маданият» жылы деп белгиленген. Ошонун шарапаты менен ушул жылы биздин Жаңы –Жол айыл өкмөтүндө маданият үйү тургузулуп калса жакшы болот эле. Анткени бул маданият үйү 1962-жылы тургузулуп, 2007-жылы жарактан чыккан дагы 2011-жылы толугу менен кулап түшкөн. Белгилеп кетүүчү негизги нерсе, маданият үйүнүн кулап түшүшүнө Бакиевдердин тийшеси жок, себеби учурда өткөн бийликти күнөөлөө салтка айланып бара жатат. Маданият үйүнүн имаратын тургузуу боюнча токтолсом, биздин жергиликтүү айыл өкмөттөрү, бийликтин жана депутаттардын барбаган жери калган жок, бийлик тарабынан эч кандай жооп болбоду”, — деди жергиликтүү депутат.
Эске сала кетсек, Жаңы-Жол айыл өкмөтүндө жалпысынан 7 168 (жети миң бир жүз алтымыш сегиз) калк жашаса, тарыхый инсандары Токтогул сүйгөн Алымкан жана маркум коомдук ишмер Макен Сыдыков, Убактылуу Өкмөттүн тушунда Жогорку Соттун төрагасы болуп турган Кубанычбек Момбеков, обончу жана аткаруучу Жаныш Кочкоровдордун айылы.
Гүлжан Шерипбаева, Кyrgyztoday.kg
КОММЕНТАРИЙ КАЛТЫРУУ