“Gezitter.org» сайты өлкөдөн сырткары жерде катталганы менен негизинен Кыргызстандагы болуп жаткан окуяларга тыкыр көңүл бөлүп, кыргызчаларын орусчага которуп, жарыялап турат. Маанилүү маселелерден четте калбай, тараптарды «жаман-жакшы» деп ылгабай, саясый спектрди толук камтып, ак-көк катары бөлбөй калыстык менен чагылдыруу аркылуу коомчулуктун назарына илинип, абройго ээ болгонун тана албайбыз.
Бирок, сайтынын комментарийлер бөлүгүнө кирсең көңүлүң иренжийт. Оозунан “ак ит кирип, кара ит чыккандардын” баары топтолуп алып, оозго алгыс сөздөр менен бирин-бири ашата сөгүп жатканына күбө болуп, уяласың. Ошол сайтта иштеп жаткан кызматкерлер каякты карап отурат. Же эмне аларга баары бирби? Ушундай абройлуу сайтка чыпка коюп, уят сөздөрдү жана адамдардын ар-намысына шек келтирген мазактоолорду неге алып салбайт?
Көрсө, кептин маңызы башка жакта экен. Айрым маалыматтар боюнча, “Gezitter.org” буга чейин «Өнүгүү-Прогресс» партиясынын лидери Бакыт Төрөбаевге жан тартып, ал тууралуу жагымсыз маалыматтарды тазалап келгенин, колдогонун байкап жүрөбүз. Ким билет? Төрөбаев жең ичинен кандайдыр бир шарттар менен ээлик кылганга өткөн жокпу? Андай болсо, кызык суроо туулат. Президент Алмазбек Атамбаевди баш кылып, калганын төш кыла комментарийлер менен сайттын окурмандары жайлап атышса, Бакыт мырза эмнеге билмексен болуп отурат? Жалгыз эле президентти эмес, баарын жаман сөздөр менен поктоп атышат… Аталган сайттын түзүүчүсү Максим Каганер «Өнүгүү-Прогресстин» идеологиясын тейлеп жүргөндөн кийин, башка эмнени сөз кылабыз? Же Курманбек Бакиевдин качып кеткенине ичи ачышкан, агездеги министрлик кызматын Убактылуу өкмөткө жулдуруп ийген Теребаев ичтен кекенип, Атамбаев жана анын тилектештеринен өч алууга киришкен чагыбы? Балким, бул башталышы го… Көзгө суук жыландын башы эми көрүнөбү?..
Булак: “Азия news”
КОММЕНТАРИЙ КАЛТЫРУУ