Жогорку Кеӊеште өлкөдө көп үйрөнүүгө мүмкүнчүлүк түзүүгө багытталган «Кыргыз Республикасында көп тилдүү билим берүүнү киргизүү жөнүндө» токтом кабыл алынды.
Депутат Талант Мамытовдун айтымында, Баш мыйзамда бекитилген кыргыз тилинин мамлекеттик статусу этникалык топтор аралык ынтымакты бекемдөөдө, коомчулук башын бириктирүүдө чечүүчү мааниге ээ. «Ал эми расмий статуска ээ болгон орус тили улуттар аралык пикир алышуу милдетин аткарат. Мында англис тилинин дүйнөлүк алкакта ээлеген ордун унутта калтырууга болбойт. Ошондуктан, бул тилдерди билүү бизге көп артыкчылыктарды берет», – дейт ал.
Депутат кыргыз тилинде сабак өтүлгөн мектептерде орус жана англис тилдерин окутууну кыргыз тилинин деӊгээлине жеткирүү, ал эми орус тилиндеги мектептерде кыргыз тили менен англис тилдерин окутууну орус тилин окутуунун деӊгээлине көтөрүү зарылдыгын белгиледи. «Ошондон улам, Жогорку Кеӊештин токтому аркылуу Өкмөткө 3 айлык мөөнөттө бул концепцияны 2016-2020-жылдар аралыгында ишке ашыруу үчүн кошумча каражат табуу тапшырмасы берилүүгө тийиш», – деп кошумчалады ал.
Демилгечилердин айтымында, концепция азырынча Жогорку Кеӊештин токтому менен ишке ашырыла баштайт, ал эми келечекте атайын мыйзам долбоорун иштеп чыгуу зарыл.
Андан сырткары, эл аралык тажырыйбаны эске алуу менен, КР Өкмөтү 2016-жылдын 1-декабрына чейин окуучуларга башталгыч класстан тарта мамлекеттик тилди, расмий тилди, дагы бир чет тилин үйрөтүү боюнча концепцияны ишке ашыруу программасын иштеп чыгышы керек. Ошондой эле, Өкмөткө токтомду аткаруу жаатында бир катар тапшырмалар берилди.
КОММЕНТАРИЙ КАЛТЫРУУ