“Эркин муун” либералдык жаштар альянсы жана “Реформа жана натыйжа үчүн” жарандык союзу Бишкек шаарынын Свердлов районунун, Өзгөн жана Талас шаарларынын ички иштер органдарынын (ИИО) ишине тышкы баа берүүнүн жаңы ыкмаларын апробациялоонун жыйынтыктары боюнча тегерек стол өткөрөт. Тегерек стол “Плаза” мейманканасында саат 9:30да өткөрүлөт. Дареги Тоголок Молдо көчөсү, 52.
USAIDдин Биргелешип башкаруу программасы тарабынан колдоого алынган “ИИОнун ишине тышкы баа берүү: жаңы ыкмаларды апробациялоо” долбоорунун алкагында пилоттук региондордо жергиликтүү бийлик жана шаардык кеңештер бекиткен демилгечил топтор түзүлгөн, ошондой эле изилдөө жүргүзүлгөн. Изилдөөнүн жыйынтыктары пилоттук региондордо калктын ишениминин деңгээлин жана аларды ИИОнун кабылдашын аныктоого, ИИО тарабынан көрсөтүлүүчү кызматтардын жеткиликтүүлүгү жана сапаты жөнүндө коомдун пикирин билүүгө жана аймактагы укуктук тартип чөйрөсүндөгү проблемаларды ИИОнун чече ала тургандыгына баа берүүгө жардам берди.
Изилдөө сурамжылангандардын 40,4%ы ИИОнун иши тууралуу ЖМКлардан жана Интернет аркылуу билишээрин көрсөттү. Калктын ИИОнун иши тууралуу маалымдар болушунун маанилүү критерийи болуп жашоочулардын өздөрүнүн участкалык ыйгарым укуктуу милициясын билүүсү саналат. Бардык пилоттук аймактарда сурамжылангандардын 62%дан көбү өздөрүнүн участкалык милиционерин көргөн эмес же ага кайрылган да эмес. Сурамжылангандардын көпчүлүгү – 85%ы жергиликтүү милициянын начальнигин жана ИИОнун жетекчилигин билбейт. Жарандардын жеке коопсуздугу боюнча социалдык кооптуулуктун жетишээрлик түрдө жогорку деңгээли аныкталды. Беш проблема пилоттук аймактардын жашоочуларын көбүрөөк тынчсыздандырат, алар: уурулук, баңги жана ичкилик, коррупция, ээнбаштык, радикалдуулук/экстремизм.
Тегерек столдо изилдөөнүн жыйынтыктары жана милициянын ишин жакшыртуу боюнча сунуштамалардын жыйындысы көрсөтүлөт. Башкы сунуштама болуп ИИОнун ишине тышкы баа берүү үчүн жергиликтүү өз алдынча башкаруу органдарынын, ИИОнун жана жарандык коомдун коомдук коопсуздукту камсыз кылуу жана укук бузуулардын алдын алуу боюнча биргелешкен пландарын колдонуу саналат. Бул ыкма алгач калктын укуктук тартиптин камсыз болушуна муктаждыгын түшүнүүгө, андан соң милиция коомдун муктаждыгына жараша канчалык иштей ала тургандыгына байкоо жүргүзүүгө мүмкүндүк берет.
Биргелешип башкаруу программасы Кыргыз Республикасында өкмөттүн, жарандык коомдун жана менчик сектордун өнөктөштүгүн чыңдоого багытталган. Программа АКШнын Эл аралык өнүгүү боюнча агенттиги (USAID) жана Улуу Британиянын Эл аралык өнүгүү министрлиги (DFID) тарабынан каржыланган жана Ист-Вест Менеджмент Институту (EWMI) тарабынан ишке ашырылууда.
КОММЕНТАРИЙ КАЛТЫРУУ