Деги биздин айрым адамдардын түшүнүгүнө таң калбай кое албайсың. Бийлик коррупция, кылмыштуулук менен күрөшпөй жатат, мамлекеттин бүтүндүгүнө, туруктуулугуна шек келтиргендерди жазалоодон коркуп, мажүрөөлүк кылат деп кинелешет дагы, чара көрүп, чектен чыккандарды ийнине киргизип жазалап баштаса бийлик куугунтуктай баштады “кокуй” дегенди айтышып, коргоо комитеттерин түзүп чуу түшүп жатып калышат. “Башы жок бака, көзү жок көгөн” деген даана биздин элге куп жарашат экен. Мына бийликти күч менен басып алууга шектелип камалышкан Кубанычбек Кадыров, Бектур Асанов, Эрнест Карыбеков, Дастан Сарыгулов, Бекболот Талгарбеков, Төрөбай Колубаев, Марат Султанов, Александр Гусев, Тойгонбек Калматовдорду коргоо комитети түзүлүп, өзүнчө эле шоу башташты. Албетте, коргойбуз дегендер камалгандардын жакын урук-туугандары, бөлөк-бөтөн эч ким жок. Деги ушул “менин тууганым кылмышкер болсо болсун, бирок камалбасын бошотулсун” деген жаман адатыбыз качан калат болду экен. Ак-карасын сот аныктасын, күнөөсү болсо жазасын алып, күнөөсүз болсо акталсын деген түшүнүк качан мээбизге жетет?
Булак: Фабула
КОММЕНТАРИЙ КАЛТЫРУУ