Берлинде “Норманд төрттүгү” лидерлеринин жолугушуусу аягына чыкты. Анда Орусия, Украина, Франция президенттери жана Германия канцлери Донбасстагы жаңжалды жөнгө салуу маселесин талкуулашты
Иш-чара бүткөн соң Украина президенти Петр Порошенко билдиргендей, тараптар Донецк жана Луганск облустарына ЕККУнун куралдуу миссиясын жөнөтүүгө макулдуктарын беришти. Порошенконун айтымында, Минск келишимин аткаруу боюнча “жол картанын” деталдары ноябрда“норманд төрттүгүнүн” тышкы иштер министрлери тарабынан бекитилиши керек.
Украина жана Сириядагы жаңжалдарга арналып Берлинде өткөн алты сааттык сүйлөшүүлөрдөн кийин Германия канцлери Ангела Меркель “укмуштарга жетүү мүмкүн болбогонун” бирок жаңы жол карта 2015-жылдагы Минск келишимдерин алдыга жылдырууга шарт түзөрүн билдирди.
Сүйлөшүүнүн катышуучулары мындан тышкары жаатташкан тараптардын ортосунда кийлигишпөөчү зона түзүү жана гуманитардык абалды жакшыртуу үчүн чара көрүү боюнча макулдашышты. Меркель ыңгайлуу учурду өткөрүп жибербөө үчүн бул сыяктуу сүйлөшүүлөрдү улантуу керектигин айтты.
Украина президенти Петр Порошенко жаңы жол карта Минск келишимдеринин ырааттуу түрдө ишке ашырылышын камсыздоого тийиш экенин баса белгиледи. Ал Донбасстагы фронттук линияга жакын төрт жаңы аймактан аскерлерди алып чыгып кетүү боюнча макулдашуу жетишилгенин кабарлады.
Украинанын чыгышында ЕККУнун полиция миссиясын жайгаштыруу менен уюмдун байкоочулары жандарында курал алып жүрүүгө жана бардык райондорго кирүүгө мүмкүнчүлүк алышат.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ