1-январда Ашхабаддагы жаңы эл аралык аэропортту курган Полимекс түрк курулуш компаниясынын өкүлдөрү президенттин администрациясына чакырылышты. Бул тууралуу «Азаттыктын» түркмөн кызматы жеке булактарына шилтеме кылып билдирди. Буга чейин курулганына бир нече гана ай болгон аэропорттун имараты чөгүп, терезелер сынып, коммуникациясы жарактан чыккандыгы кабарланган.
Маалыматка караганда, 2,2 миллиард АКШ долларына бааланган долбоорду ишке ашырган Полимекс компаниясынын өкүлдөрүнөн имараттагы көйгөйлөрдүн жаралуу себептерин жана ал маалыматтардын кантип ММКларга жайылып кеткендигин түшүндүрүп берүүнү талап кылышкан.
«Алгач аба майданда болгон окуяны президенттен жашырышкан. Кийин ал тууралуу белгилүү болгон соң имараттагы көйгөйлөр үчүн гана эмес, маалыматтын ММКларга жайылып кеткендиги боюнча да чоң жаңжал чыкты», – деп билдирген булак.
Учурда имараттагы кемчиликтерди жоюу боюнча атайын комиссия түзүлүп, анын чөгө башташынын себептерин изилдей турган жергиликтүү жана чет элдик адистердин тартылгандыгы кабарланууда.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ