Өзбекстанда диний себептер менен соттолгон адамдардын абактагы абалы оор бойдон калууда. Бул тууралуу 12-майда өлкөнүн көз карандысыз укук коргоочуларынын демилгелүү тобунун төрагасы Сурат Икрамов билдирди.
Анын маалыматына караганда, абактагы үч бир тууган Мирзаевдер кыйноого алынып, аларга карата Жазаларды аткаруу мекемесинин жетекчисинин мыйзамдуу талаптарына баш ийбөө беренеси боюнча негизсиз айыптар тагылган.
Алардын бири Абдукарим Мирзаев 2009-жылы февралда 8 жылга соттолгон. Ал диний экстремисттик жана сепаратисттик уюмду түзүү менен конституциялык түзүлүшкө кол салууга айыпталган. 2017-жылдын январында, камактагы мөөнөтүнүн аяктарына бир ай калганда Абдукаримге карата чачын туура эмес алдыргандыгы үчүн кылмыш иши козголуп, үч жылга эркинен ажыратылган.
Анын бир тууганы Ахмадилло Мирзаев болсо 2006-жылдын майында 5 жылга эркинен ажыратылган. Бирок камактагы мөөнөтүнүн бүтөрүнө 4 ай калганда ага карата дагы бир кылмыш иши козголуп, 6 жылга соттолгон. 2017-жылдын январында экинчи мөөнөтү аяктап калганда Мирзаевге үчүнчү кылмыш иши козголгон. Бул жолкусунда ага төшөнчүсүн жыйнаган эмес деген айып тагылып, 4 жыл 7 айга кесилген.
Бир туугандардын үчүнчүсү Абдувохид Мирзаев 2006-жылы экинчи жолу 11 жылга эркинен ажыратылган. 2017-жылдын апрелинде камактагы мөөнөтү аяктаган, бирок туугандары учурда анын каякта экендигин билишпейт.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ