Тажикстандын Asian Express Terminal компаниясы Ташкенттен эки өлкө ортосундагы автобус байланышын калыбына келтирүү боюнча сунушка жооп берүүсүн күтүүдө. Бул тууралуу компаниянын өкүлү Алижон Валиев билдирди.
Валиев автобус байланышын калыбына келтирүү маселеси буга чейин Өзбекстан менен Тажикстандын элчилик өкүлдөрү тарабынан талкууланганын билдирди. Эгер оң жооп болсо Asian Express Terminal компаниясынын автобустары ушул жылдын күзүнөн тарта Дүшөмбү-Ташкент-Дүйшөмбү, Дүйшөмбү-Самарканд-Дүйшөмбү жана Дүйшөмбү-Бухара-Дүйшөмбү багыттары боюнча каттап баштайт.
Анын айтымында, Өзбекстан менен автобус байланышынын калыбына келиши тажик жүргүнчүлөрүнүн Орусияга баруусун дагы жеңилдетет – учурда компаниянын автобустары Орусияга Кыргызстандын аймагы аркылуу барат.
Быйыл 11-апрелде 25 жылдан бери алгачкы жолу Дүйшөмбү аэропортуна «Өзбек аба жолдорунун» учагы конгон. 10-февралда Тажикстандын «Сомон Эйр» авиакомпаниясы Ташкентке алгачкы сыноо каттамын жасаган. Тараптар абалды изилдеп чыккандан кийин азырынча Ташкент-Дүйшөмбү-Ташкент багыты боюнча каттамдарды «Өзбек аба жолдору» гана аткарат деген чечимге келишкен.
Өзбекстан менен Тажикстандын шаарларынын ортосундагы ырааттуу автобус жана аба каттамдары 1992-жылы, Тажикстанда жарандык согуш башталганда токтогон.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ