Орусиянын Коргоо министрлиги өлкөнүн аба күчтөрүнүн соккусунан «Ислам мамлекети» тобунун лидери өлтүрүлгөнүн билдирди. Мекеменин маалыматына караганда, Абу-Бакр аль-Багдади майдын аягында Ракканын түштүгүндөгү аба соккуларынын жыйынтыгында мерт болгон.
Бул «Ислам мамлекетинин» башчысынын өлтүрүлгөндүгү тууралуу алгачкы билдирүү эмес. Мындай ушактар ММКларда буга чейин дагы бир канча жолу пайда болуп, бирок дайыма төгүндөлүп келген. Акыркы жолу исламчылардын өлүмү тууралуу басылмалар өткөн жумада жазышкан. Бирок азыркыга чейин жихадчыларга каршы күрөшүп жаткан өлкөлөрдүн аскердик мекемелери тарабынан мындай билдирүүлөр болгон эмес.
Орусия Коргоо министрлигинин билдирүүсүндө аль-Багдадинин өлүмү тууралуу маалыматтар текшерилип жатканын жана ырасталышы керектиги айтылат.
Аль-Багдади «Ислам мамлекети» тобун 2014-жылдын июнунан бери башкарып келет. Жихадчылар Сирия менен Ирактын бир катар аймагын басып алып, андагы өз таасирин кеңейтүү аракетин көрүп келет. Топ жай тургундарга карата көптөгөн кылмыштарды жасаган, геноцид кылган деп айыпталууда.
ИМ тобуна каршы АКШ башында турган эл аралык коалиция дагы күрөш жүгүзүүдө. 2015-жылы сентябрда Орусия Сирияда аскердик операцияларын баштап, ал дагы исламчыларга каршы күрөшкө багытталганын билдирген.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ