2017-жылдын 2-август күнү болжол менен саат 10:00 чамасында Токмок шаарынын ички иштер бөлүмүнүн нөөмөт бөлүмүнө айланма жолго жакын жайгашкан көлмөлөрдүн жанынан эркек кишинин жансыз денеси жаткандыгы тууралуу маалымат келип түшкөн. Бул туурасында Чүй ОИИББнын Басма сөз кызматы маалымдайт.
Бул окуя боюнча Токмок шаарынын ички иштер бөлүмүнүн ыкчам-тергөө тобу окуя болгон дарекке чыгышып, 30-35 жаштар чамасындагы азиат улутундагы эркек кишинин жансыз денесин табышкан. Жансыз денеге кароо жургүзүү учурунда денесинде жаракаттар байкалып, киши колдуу болуп өлтүрүлгөндүгү аныкталган. Анын кийиминен “БМВ” үлгүсүндөгү автоунаанын ачкычы жана документи, өзүнүн паспортунун көчүрмөсү табылган. Ал Жумгал районунун 30 жаштагы Ш.А. аттуу тургуну экендиги такталган.
Чүй облусунун ИИББнын кылмыш иликтөө кызматкерлери тарабынан жүргүзүлгөн ыкчам издөө иш-аракеттеринин натыйжасында жогорудагы кылмышка шектүү делип каза болгон жарандын бир тууган агасы 33 жаштагы Ш.Т. кармалып, суракка алганда, иниси экөөнүн ортосунда пикир келишпестиктен улам уруша кетишип, иниси таяк көтөрүп аны чабаарда колундагы таякты тартып алып, инисин баш тарапка эки ирээт чаап жибергенин билдирген. Анын каза болуп калганын билип, Нарынга жеткирүү максатында унаага салып жолдо бара жатып, туугандарына билдирүүнүн айласын таба албай суунун жээгине ыргытып таштап, окуя болгон жерден из жашырып кеткенин билдирген. Бул окуя боюнча Токмок шаарынын ИИБнин тергөө бөлүмү тарабынан Кыргыз Республикасынын кылмыш-жаза кодексинин 97-беренеси (Адам өлтүрүү) боюнча кылмыш иши козголуп кармалган жаран Токмок шаарынын ИИБнин убактылуу кармоочу жайына камакка алынган. Учурда тергөө иштери жүргүзүлүүдө.
КОММЕНТАРИЙ КАЛТЫРУУ