Тажикстанда прапорщикти барымтага алган жоокер өлтүрүлдү

Маалыматтарга караганда, 20 жаштагы жоокер Сафарбек Хонов прапорщикти 25-августта эртең менен барымтага алган. Айрым булактар анын жанында граната болгонун жана өзү менен барымтага алынган кишини жардырам деп коркутканын билдиришти. Жоокер эмне себептен бул кадамга барганы белгисиз.

“Дээрлик үч саат сүйлөшүүлөр жүрдү. Бирок ал бир дагы шартка макул болбой, арачага түшкөндөргө ок чыгарды. Жыйынтыгында аны атууга туура келди”, -деди өз булак.

Барымтага алынган прапорщиктин ысымы айтылган жок, атышуу учурунда мойнуна ок тийип ооруканага жаткырылганы гана маалым. Сафарбек Хонов армияга 2016-жылы чакырылган, жарым жылдан кийин мөөнөтү аягына чыкмак.

Тажикстандын Чек ара башкы башкармалыгы бул маалыматты тастыктап, тергөө иштери башталганын билдирди.

Булак: “Борбор Азия жаңылыктар кызматы”