2-сентябрь кечинде Астананын борборунда курулуп жаткан «Абу-Даби Плаза» соода комплексинин аймагында жергиликтүү жана Индиядан келген жумушчулардын ортосунда мушташ болду.
Жаңжалды басууга полициянын атайын багыттагы отряды тартылып, курулушка жакын бир нече көчө жабылды. Жаңжал боюнча тартылган сүрөт, тасмалар социалдык тармактарга жарыяланып, көптөгөн талкууларды жаратты.
Окуядан көп өтпөй Казакстандын маалымат жана коммуникациялар министри Даурен Абаев жана Астананын акими Асет Исекешов комментарий берип, жаңжал басылганын кабарлап, тургундарды “ар кыл чагымдарга алдырбоого” чакырышты.
https://www.facebook.com/sergey.hirshfeld/videos/10213736745791276/
Казак полициясынын маалыматы боюнча, чыр күзөтчүнүн мас абалындагы индиялык курулушчуну соода борборунун имаратына киргизбей койгонунан башталган. Мындан соң индиялыктар жергиликтүү күзөтчүнү сабап коюшкан. Ошондон кийин 30дан ашык киши катышкан жапырт мушташ башталган. Жаңжалды жайгарууга Индиянын Казакстандагы элчиси жана жергиликтүү бийлик өкүлдөрү да келишкени дагы кабарланды.
Астанадагы “Абу-Даби Плаза” соода борборунун курулушу 2010-жылдан бери жүрүп келет. Өкмөттүк имараттарга жакын жайгашып, Борбор Азиядагы эң бийик имарат болот делген борбордун курулушу быйыл бүткөрүлөрү айтылган.
Булак: “Борбор Азия жаңылыктар кызматы”
КОММЕНТАРИЙ КАЛТЫРУУ